15 лістапада, Мінск /Юлія Огнева - БЕЛТА/. Ураду ўдалося забяспечыць макраэканамічную стабілізацыю, заявіў прэм'ер-міністр Беларусі Андрэй Кабякоў на пасяджэнні Савета Міністраў у пашыраным складзе, перадае карэспандэнт БЕЛТА.
"Галоўныя вынікі мінулага перыяду - нам удалося забяспечыць бягучую макраэканамічную стабілізацыю. Улічваючы знешнія шокі, з самага пачатку 2016 года ўрад з Нацбанкам вымушаны прымяніць строгія меры па бюджэтнай кансалідацыі і збалансаванасці плацежнага балансу, не ўключаючы друкарскі станок", - адзначыў Андрэй Кабякоў.
У выніку, паводле яго слоў, было зніжана дырэктыўнае крэдытаванне, узмоцнены патрабаванні банкаў да ацэнкі інвестыцыйных праектаў. "Несумненна, такія меры аказалі стрымальны ўплыў на эканамічны рост, інвестыцыйную дзейнасць і стан грашовых даходаў насельніцтва. Але пры гэтым, прасеўшы колькасна, мы маем якаснае паляпшэнне макраэканамічных параметраў", - рэзюмаваў Андрэй Кабякоў.