12 ліпеня, Масква /Эдуард Півавар - БЕЛТА/. Беларускі бок гатовы знайсці канструктыўны падыход па ўсіх складаных пытаннях узаемадзеяння з Расіяй. Аб гэтым заявіў прэм'ер-міністр Беларусі Андрэй Кабякоў, сустракаючыся сёння ў Маскве з прэм'ер-міністрам Расіі Дзмітрыем Мядзведзевым, перадае карэспандэнт БЕЛТА.
Як паведаміў расійскі прэм'ер-міністр, гэта сустрэча мае аператыўны характар. "Акрамя бягучых пытанняў нашага супрацоўніцтва, ёсць адно даволі значнае - існуючая сітуацыя ў сферы энерганосьбітаў", - сказаў ён.
Дзмітрый Мядзведзеў нагадаў, што па пытаннях пастаўкі энерганосьбітаў вяліся кансультацыі на ўзроўні віцэ-прэм'ераў і профільных міністэрстваў. "Паколькі рашэнні не былі прыняты, мы дамовіліся сустрэцца ў Маскве", - растлумачыў ён.
Прэм'ер-міністр Расіі адзначыў высокі ўзровень беларуска-расійскага ўзаемадзеяння, партнёрскія адносіны паміж дзвюма краінамі. "Таму ёсць тэмы, па якіх нам неабходна абавязкова дамаўляцца", - падкрэсліў Дзмітрый Мядзведзеў.