Прамовы і інтэрв’ю
Якія пытанні вынеслі на Рэспубліканскі савет па гістарычнай палітыцы? Крутой абазначыў парадак дня
25 верасня, Мінск /Кар. БЕЛТА/. На пасяджэнне Рэспубліканскага савета па гістарычнай палітыцы пры Адміністрацыі Прэзідэнта вынесены шэраг пытанняў. Яны датычыцца аб'ектаў гісторыка-культурнай спадчыны, фарміравання пантэона нацыянальных герояў, актуальнасці дасертацыйных даследаванняў і іншых значных тэм. Аб гэтым журналістам заявіў кіраўнік Адміністрацыі Прэзідэнта Беларусі Дзмітрый Крутой перад пачаткам пасяджэння савета, перадае карэспандэнт БЕЛТА.
Дзмітрый Крутой нагадаў, што Прэзідэнт Беларусі Аляксандр Лукашэнка 17 верасня правёў сустрэчу з ідэалагічным актывам, гістарычнай і экспертнай супольнасцю, прысвечаную Дню народнага адзінства. Значная частка часу на гэтай сустрэчы была ўдзелена менавіта гістарычнай тэматыцы. "Мы вырашылі па гарачых слядах сабраць пасяджэнне Рэспубліканскага савета па гістарычнай палітыцы і абмеркаваць тыя праблемы і задачы, якія паставіў Прэзідэнт", - расказаў Дзмітрый Крутой.
Кіраўнік Адміністрацыі Прэзідэнта звярнуў увагу, што адна з асноўных задач - аб'ектыўнае адлюстраванне гістарычнага развіцця рэспублікі. "Лідар нашай краіны прысвяціў гэтаму вельмі вялікі блок у сваім выступленні і папрасіў нас нічога не прыхарошваць, нічога не рэтушаваць, максімальна аб'ектыўна паказваць любую гістарычную падзею, якая адбывалася ў Беларусі, на аснове архіўных, статыстычных матэрыялаў, экспертных даследаванняў і заключэнняў. Гэта вельмі важна з пункту гледжання сучаснай падачы ў школьных падручніках, метадычных дапаможніках, дысертацыйных работах і інфармацыі для тых жа турыстычных гідаў. Цяпер вялікі ўздым унутранага турызму ў Беларусі, і падрыхтоўку і атэстацыю гідаў (трэба праводзіць. - Заўвага БЕЛТА) на аснове ўсіх гэтых звестак і даных, каб не было нідзе скажэнняў", - канстатаваў ён.
У якасці прыкладу Дзмітрый Крутой прывёў Дзень народнага адзінства і розніцу ў адлюстраванні гістарычных падзей тых гадоў з польскага і беларускага бакоў. Размова ідзе ў тым ліку аб інфармацыі, што трансліруецца ў СМІ. "У нас больш глыбокі матэрыял, падмацаваны адпаведнай фактурай і разбіты на блокі. Гэта і прамысловасць, і сацыяльная сфера, і стан беларускіх зямель у рамках этнацыду. І мы вось гэты этнацыд падмацавалі адпаведнай інфармацыяй. Ён (Прэзідэнт. - Заўвага БЕЛТА) пахваліў у гэтым плане ў тым ліку журналістаў і сказаў, што гэта элемент інфармацыйнай барацьбы менавіта цяпер, у моманце, фактычна ў рэжыме рэальнага часу. Таму (патрэбна. - Заўвага БЕЛТА) каб і астатнія гістарычныя падзеі, у якіх фактычна трэба змагацца за наш пункт гледжання і праўду, адлюстроўваліся менавіта такім чынам. Тут нашы вучоныя-гісторыкі павінны дапамагаць рыхтаваць адпаведныя матэрыялы", - сказаў кіраўнік Адміністрацыі Прэзідэнта.
Адно з важных пытанняў, якое вынеслі на пасяджэнне савета, - манументальныя аб'екты Беларусі, якія ўяўляюць сабой гісторыка-культурную каштоўнасць. "Ідзе актыўнае фарміраванне праграмы будучай пяцігодкі, таму мы сёння заслухаем прадстаўнікоў Савета Міністраў. Гэта ўсё сур'ёзныя фінансавыя патокі і рэсурсы, - падкрэсліў Дзмітрый Крутой. - Нашы ў першую чаргу кіраўнікі аблвыканкамаў гавораць, што нам патрэбны больш актуалізаваны пералік гэтых аб'ектаў, каб закладваць фінансаванне. Улічваючы, што асноўны спіс фарміраваўся ў дзевяностыя гады і шмат што ўжо страціла актуальнасць, вельмі важны пункт гледжання нашых гісторыкаў".
Не менш важная тэма - пантэон нацыянальных герояў. Прапанова аб фарміраванні такога пантэона прагучала ад кіраўніка дзяржавы 17 верасня. "Зноў жа, вяртаючыся да Вялікай Айчыннай вайны... Там нашы героі адлюстраваны нядрэнна. Журналісты на працягу года падтрымліваюць у гарачым стане гэту тэму. А вось пра герояў, дапусцім, вызваленчага паходу Чырвонай Арміі 1939 года, гавораць менш. І так астатнія перыяды і эпохі", - заўважыў кіраўнік Адміністрацыі Прэзідэнта.
Пры гэтым, дадаў ён, характарыстыка гэтага пантэона герояў павінна быць максімальна аб'ектыўнай: "Каб кожны беларус дакладна ўяўляў сабе нашых жыхароў, якія ўнеслі ўклад не толькі ў нас у краіне, але і, магчыма, у гістарычныя падзеі іншых краін".
Наступная важная тэма - каардынацыя паміж навукай вышэйшай школы і профільнымі інстытутамі Нацыянальнай акадэміі навук у частцы актуальнасці дысертацыйных даследаванняў. "Не хочацца расходаваць рэсурсы - і людскія, і фінансавыя - на неактуальныя тэмы. Спецыялісты Акадэміі навук чарговы раз пацвердзілі мне, што ў нас мільёны (я не перабольшваю) старонак неразабраных архіваў. І нашых гісторыкаў, даследчыкаў трэба накіраваць на тыя тэмы, якія найбольш важныя, запатрабаваныя і актуальныя менавіта сёння",- лічыць Дзмітрый Крутой.
Асобным блокам вынеслі пытанне аб міжнародных праектах, прысвечаных гістарычным падзеям. "Вядома, вялікая цікавасць гісторыкаў Расіі, Казахстана, у першую чаргу прасторы СНД, - сказаў Дзмітрый Крутой. - Перш чым аб такіх праектах дакладваем на ўзроўні Прэзідэнта, яны праходзяць экспертызу нашага Рэспубліканскага савета па гістарычнай палітыцы".
Кіраўнік Адміністрацыі Прэзідэнта звярнуў увагу і на такое пытанне, як фарміраванне музейных экспазіцый, у прыватнасці ў новым будынку Нацыянальнага гістарычнага музея. "Будаўнічыя работы ўжо цяпер у высокай ступені гатоўнасці, і мы падыходзім да стадыі падрыхтоўкі экспазіцый гістарычных залаў. І таму меркаванне членаў рэспубліканскага савета ў гэтым пытанні вельмі важнае. Мы не павінны памыліцца, паралельна робячы многія работы. І тыя эскізы і матэрыялы, аб якіх будзем дакладваць Прэзідэнту па напаўненні музея, таксама павінны прайсці адпаведную экспертызу савета", - сказаў на заканчэнне ён.
версія для друку
зрабіць стартавай
дабавіць у выбранае