Прамовы і інтэрв’ю

"Наш тэатр не ўпершыню звяртаецца да класічнай музыкі азербайджанскага народа. Некалькі гадоў таму мы ўпершыню паставілі балет "Сем прыгажунь" на музыку азербайджанскага класіка Кара Караева. Беларускі спектакль быў паказаны ў Баку, і ад яго бакінская публіка была ў захапленні. Менавіта тады і з'явілася ідэя паставіць яшчэ адзін балет", - расказаў Уладзімір Грыдзюшка.

Паводле яго слоў, у тэатры пераканаліся, што пастаноўкі спектакляў на ўсходнюю тэматыку бяспройгрышныя - яны заўсёды карыстаюцца папулярнасцю ў гледача. На гэта творчы калектыў разлічвае і цяпер. "Палада Бюльбюль аглы ведаюць абсалютна ўсе ў нас у Беларусі, ён дарагі і блізкі кожнаму гледачу, незалежна ад узросту. Многія выраслі на яго мелодыях, на яго песнях, у тым ліку для кінафільмаў, - падкрэсліў гендырэктар Нацыянальнага акадэмічнага Вялікага тэатра оперы і балета. - Музыка Палада, які з'яўляецца вучнем знакамітага кампазітара Кара Караева, блізкая і зразумелая людзям".

Уладзімір Грыдзюшка таксама адзначыў, што пасля азнаямлення з музыкай Палада Бюльбюль аглы для балета "Каханне і смерць" у тэатры былі ўражаны тым, наколькі яна яркая, змястоўная, прыгожая. Таму нават не было сумненняў, што ўсё атрымаецца, будзе пастаўлены цудоўны спектакль.

Прэм'ерныя паказы балета "Каханне і смерць" у Нацыянальным акадэмічным Вялікім тэатры оперы і балета Беларусі запланаваны на 11 і 12 чэрвеня. Пастаноўку прадставяць у час "Балетнага лета ў Вялікім", а потым гледачы ўбачаць яе 28 чэрвеня: балет завершыць 83-і тэатральны сезон. У аснове балета - нацыянальны азербайджанскі эпас "Кітабі Дэдэ Коркуд". Ён па праву лічыцца адным з лепшых узораў старажытных помнікаў сусветнай пісьмовай літаратуры і ўключаны ў Спіс нематэрыяльнай духоўнай спадчыны ЮНЕСКА.

Над балетам "Каханне і смерць" Палада Бюльбюль аглы ўжо больш за год працуе міжнародны творчы калектыў. Гэта балетмайстар-пастаноўшчык - харэограф Вольга Костэль, дырыжоры-пастаноўшчыкі Эйюб Куліеў (Азербайджан) і Андрэй Іваноў (Беларусь), мастак-пастаноўшчык - Аляксандр Касцючэнка, мастак па касцюмах - Кацярына Булгакава, навуковы кансультант - доктар мастацтвазнаўства Улькяр Аліева (Азербайджан), дырыжор - Алег Лясун (Беларусь).