Прамовы і інтэрв’ю

Галоўчанка расказаў, на якія праекты Беларусь накіруе $1,5 млрд крэдыту ад Расіі

Фота з архiва

2 лістапада, Мінск /Кар. БЕЛТА/. Прэм'ер-міністр Раман Галоўчанка ў праекце "Па факце: рашэнні Першага" на YouTube-канале БЕЛТА расказаў, на якія праекты будуць накіраваны $1,5 млрд крэдыту ад Расіі.

Як вядома, расійскі бок выдзяляе Беларусі гэтыя грошы на арганізацыю вытворчасці імпартазамяшчальнай прадукцыі. Беларусь валодае неабходнымі кампетэнцыямі, але каб цалкам задаволіць патрэбнасці расійскага рынку пасля сыходу адтуль заходніх прадпрыемстваў, рэспубліцы неабходна значна пашыраць свае вытворчыя пляцоўкі або мадэрнізаваць іх.

Беларусь прапанавала расійскаму боку больш за дзясятак імпартазамяшчальных праектаў. Цяпер, паводле слоў Рамана Галоўчанкі, ідзе працэдура верыфікацыі бізнес-планаў. Таму ў канкрэтыку беларускія чыноўнікі не спяшаюцца паглыбляцца: чакаюць, калі будуць пройдзены ўсе адпаведныя працэдуры.

"Мы глядзім канкрэтна гэты праект - будзе ён фінансавацца ці не. Гэта значыць можа атрымацца, што бізнес-план будзе проста нерабочым, і мы яго забракуем. Тады будзем шукаць новыя. Толькі два праекты прыняты ўжо. Гэта БЕЛАЗ (кольцараскатная вытворчасць) і яшчэ адзін. Прыкладна $1,2 млрд - гэта грамадзянскія праекты. І яшчэ каля $200 млн - ваенныя. Гэта будзе мікраэлектроніка ў асноўным. Практычна ўсе праекты - гэта машынабудаванне", - расказаў прэм'ер-міністр.

У Міністэрстве прамысловасці ўдакладнілі, што другі прыняты праект - вытворчасць "Амкадорам" лесапрамысловай тэхнікі. "Калі раней рынак быў даволі насычаным, то сёння кампанія "Амкадор" з'яўляецца адзіным вытворцам на тэрыторыі Саюзнай дзяржавы", - адзначыў начальнік галоўнага ўпраўлення знешнеэканамічных сувязей Мінпрама Ягор Чарняўскі.

"Тут нават трэба гаварыць не аб памеры самой сумы, а аб важнасці падтрымкі ў цяперашніх умовах, калі санкцыйныя абмежаванні ствараюць даволі вялікія складанасці з прыцягненнем крэдытных рэсурсаў. Гэта значыць я гаварыў бы не столькі пра велічыню крэдыту, колькі пра важнасць і своечасовасць, пра кошт гэтых крэдытных рэсурсаў. Усё ж такі Расійская Федэрацыя прапануе іх на даволі выгадных умовах. Закладваюцца вельмі добрыя працэнтныя стаўкі, і мы бачым, што той прадукт, які мы ў выніку будзем рэалізоўваць, будзе канкурэнтаздольным", - падкрэсліў Ягор Чарняўскі.

версія для друку

зрабіць стартавай

дабавіць у выбранае