Прамовы і інтэрв’ю

"Ёсць вялікая любоў Папы да Беларусі". Кардынал пра магчымасць візіту Льва XIV

25 кастрычніка, Пінск /Кар. БЕЛТА/. Для прыезду Папы Рымскага ў Беларусь будзе зроблена ўсё магчымае. Аб гэтым заявіў журналістам прэфект Дыкастэрыі па справах Усходніх цэркваў у Ватыкане кардынал Клаўдзіа Гуджэроці - спецыяльны пасланнік Папы Льва XIV на 100-годдзе Пінскай епархіі, перадае карэспандэнт БЕЛТА.

Клаўдзіа Гуджэроці адзначыў, што з вялікай цеплынёй ставіцца да Беларусі. "Мае ўражанні заўсёды вельмі добрыя, калі я прыязджаю на гэту зямлю. Я бачу вельмі прыгожую краіну, прыроду, якая выклікае здзіўленне, цудоўную чысціню і парадак. Людзі вельмі мілыя, гасцінныя, дабрадушныя, працавітыя", - заўважыў ён.

Раней Папу Рымскаму перадалі запрашэнне наведаць Беларусь у 2026 годзе. "Ёсць вялікая любоў Папы да Беларусі. Таксама Дзяржаўны сакратарыят Святога Прастола мае вялікую павагу да гэтай краіны. Гэта звязана з геаграфічным, геапалітычным становішчам, а таксама з вельмі багатай гісторыяй, рэлігійнай гісторыяй гэтай краіны, якая налічвае многія стагоддзі яшчэ з часоў Францыска Скарыны, які вучыўся ў тым жа ўніверсітэце, дзе я выкладаў. Мы ганарымся ім у Падуі. Бачыце, ёсць усе магчымасці для гэтага (візіту ў Беларусь. - Заўвага БЕЛТА). Хоць у Папы вельмі шмат задач, абавязкаў, мы зробім усё, што толькі зможам, для гэтага", - сказаў кардынал Клаўдзіа Гуджэроці.

Святочныя мерапрыемствы з нагоды стагоддзя Пінскай каталіцкай епархіі праходзяць сёння ў Пінску ў кафедральным касцёле Ушэсця Найсвяцейшай Дзевы Марыі. Юбілейныя ўрачыстасці прадоўжацца 26 кастрычніка ў Брэсце.

Пінская епархія была заснавана 25 кастрычніка 1925 года. Цяпер яна з'яўляецца адной з чатырох каталіцкіх епархій у Беларусі і ахоплівае тэрыторыю Брэсцкай і Гомельскай абласцей.

Клаўдзіа Гуджэроці быў Апостальскім нунцыем у Беларусі з 2011 па 2015 год.

версія для друку

зрабіць стартавай

дабавіць у выбранае