Прамовы і інтэрв’ю

ЕАЭС 2.0. Лукашэнка абазначыў контуры абноўленай версіі эканамічнага саюза

26 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 26 чэрвеня ў час выступлення на пленарным пасяджэнні Еўразійскага эканамічнага форуму "Стратэгія еўразійскай эканамічнай інтэграцыі: вынікі і перспектывы" абазначыў контуры абноўленай версіі эканамічнага саюза, перадае карэспандэнт БЕЛТА.

"Калі падпісвалі дагавор аб саюзе, 2025 год быў вызначаны своеасаблівым гарызонтам, за якім пачнецца новы этап у дзейнасці аб'яднання. І сёння ў нас ёсць усе падставы прадставіць асобныя элементы саюза 2.0. У сітуацыі сусветнай турбулентнасці важна не плесціся ў хвасце падзей, а самім уплываць у пазітыўным ключы на глабальны парадак дня, мець прадуманыя мадэлі рэагавання на знешнія выклікі", - падкрэсліў Аляксандр Лукашэнка.

Аб фірменным еўразійскім прадукце і кааперацыі

Паводле слоў Прэзідэнта, каб не згубіцца на перанасычаным сусветным рынку, у ЕАЭС версіі 2.0 павінен быць свой фірменны еўразійскі прадукт - прыкметны, запатрабаваны і па-сапраўднаму агульны для ўсіх краін-удзельніц. "Гэта базавая ўмова заваявання і ўтрымання пазіцый на сусветнай арэне", - адзначыў беларускі лідар.

У пачатку года ў звароце да кіраўнікоў дзяржаў у якасці старшыні Беларусь заявіла аб неабходнасці кааперацыі па тых напрамках, без якіх сёння немагчыма ўпэўнена адчуваць сябе сярод сусветных эканамічных лідараў. Гэта электратранспарт, мікраэлектроніка, робататэхніка, інфармацыйна-камунікацыйныя тэхналогіі, новыя матэрыялы.

"Работа па кааперацыйных праектах пачата, прыняты адпаведныя рашэнні, у саюзным бюджэце на гэтыя мэты прадугледжаны немалыя грошы. Трэба не даганяць адзін аднаго ў традыцыйных галінах, а разам стаць лідарамі ў новых, такіх, аб якіх мы пакуль, можа, нават і не думаем. Але яны самі прыйдуць. Аб'яднаўшы патэнцыялы нашых эканомік, мы можам стварыць унікальны еўразійскі прадукт. Ад самалётаў і паяздоў да лічбавых рашэнняў і штучнага інтэлекту. Сёе-тое ў гэтых галінах мы ўжо навучыліся рабіць", - заявіў Аляксандр Лукашэнка.

Аб саюзным "космасе" ва ўсіх галінах

У саюзе версіі 2.0 трэба не толькі аб'ядноўваць патэнцыялы, але і рацыянальна размяркоўваць намаганні і рэсурсы. "Відавочна, што кожнай краіне патрэбны космас, але не ў кожнай краіне для гэтага ёсць касмадром. У рамках саюза такі падыход правільны і ў іншых галінах", - заўважыў беларускі лідар.

Замест канкурэнцыі ў вытворчасці адных і тых жа тавараў, стварэння новых дубліруючых магутнасцей Прэзідэнт Беларусі прапануе сканцэнтравацца на ўзаемадапаўненні нацыянальных эканомік, убудоўванні ў вытворчыя ланцужкі існуючых флагманаў. Фарміруючы тым самым агульныя таварныя прапановы для ўнутранага рынку ЕАЭС і для экспарцёраў.

Аб сумеснай навуковай дзейнасці

Для прарыву таксама патрабуецца аб'яднаць навуковы, інжынерны і фінансавы патэнцыялы. Добрым рашэннем, упэўнены Аляксандр Лукашэнка, можа стаць стварэнне сумесных даследчых і інавацыйных цэнтраў, якія будуць распрацоўваць новыя тэхналогіі і прадукты.

"Звязка навукі і вытворчасці з арыенцірам на экспарт будзе забяспечваць і тэхналагічны суверэнітэт, і канкурэнтаздольнасць нашых тавараў на сусветным рынку", - падкрэсліў Прэзідэнт.

Аб рэзервах у сферы паслуг

Аляксандр Лукашэнка адзначыў, што сфера паслуг - гэта палова сукупнага ВУП ЕАЭС. "Рэзерваў яе росту шмат. Кропкай для сумеснага прыкладання намаганняў з перспектывай неадкладнай аддачы ў маштабах саюза з'яўляюцца сучасныя транспартныя калідоры, якія створаны на аснове нацыянальных сегментаў і аб'ядноўваюць вялікую Еўразію", - заявіў беларускі лідар.

Аб глабальным транзітным хабе

Кіраўнік беларускай дзяржавы канстатаваў, што на поўдні і ўсходзе ў ЕАЭС сфарміраваны пояс добрасуседства, і прапанаваў змацаваць яго сеткай аўтамабільных дарог і чыгункі і транспартна-лагістычных хабаў.

"Інтэграваныя еўразійскія транспартна-лагістычныя калідоры павінны стаць разумнымі, мультымадальнымі, экалагічнымі артэрыямі з адзінай лічбавай платформай адміністравання, - сказаў Прэзідэнт. - Скарачэнне часу і кошту транзіту праз Еўразію павысіць канкурэнтаздольнасць маршруту ў параўнанні з марскімі шляхамі. Дасць магчымасць пазіцыянаваць ЕАЭС як глабальны транзітны хаб".

Аляксандр Лукашэнка прапанаваў разгледзець гэту ініцыятыву сумесна з краінамі-наглядальнікамі, а таксама ў рамках дыялогу ЕАЭС - ШАС.

Аб фінансавай інтэграцыі

Фінансавую інтэграцыю Аляксандр Лукашэнка назваў яшчэ адным каталізатарам росту праз сферу паслуг. "У ЕАЭС 2.0 інвестыцыі павінны перасягаць граніцы, ствараючы новыя магчымасці. Неабходна ў найкарацейшыя тэрміны завяршыць выкананне задач па фарміраванні агульнага фінансавага рынку: падпісаць і ратыфікаваць пагадненні аб стандартызаванай ліцэнзіі ў банкаўскім і страхавым сектарах, аб узаемным допуску ўдзельнікаў фінансавага рынку", - заявіў ён.

Аб акцэнце на лічбавізацыю

Паводле слоў Прэзідэнта, у саюзе версіі 2.0 непазбежны акцэнт на лічбавізацыю. "Стварэнне адзінай лічбавай платформы для бізнесу, развіццё электроннага гандлю, выкарыстанне вялікіх даных - гэтыя тыя напрамкі, якія дапамогуць нашым эканомікам павысіць сваю эфектыўнасць", - заявіў ён у сувязі з гэтым.

"Пры гэтым унутры саюза неабходна заканчваць лозунгі аб захаванні нацыянальнага лічбавага суверэнітэту. Наадварот, трэба на практыцы састыкаваць прымяняльныя праграмныя платформы і забяспечыць трансгранічны абмен інфармацыяй з нацыянальных баз і рэестраў, прызнаць электронныя подпісы і лічбавыя дакументы", - падкрэсліў Аляксандр Лукашэнка.

версія для друку

зрабіць стартавай

дабавіць у выбранае