Прамовы і інтэрв’ю

Джон Коўл: ЗША хочуць вярнуць пасольства ў Мінск

11 верасня, Мінск /Кар. БЕЛТА/. ЗША хочуць вярнуць пасольства ў Мінск і хочуць канчаткова нармалізаваць адносіны з Беларуссю. Аб гэтым па выніках сустрэчы з Прэзідэнтам Беларусі Аляксандрам Лукашэнкам заявіў прадстаўнік Прэзідэнта ЗША Джон Коўл, перадае карэспандэнт БЕЛТА.

Праведзеную сустрэчу з Прэзідэнтам Беларусі прадстаўнік Прэзідэнта ЗША ахарактарызаваў як надзвычай плённую. "Дакладна гэтак жа, як і мая нядаўняя сустрэча гэтымі днямі з Прэзідэнтам ЗША Трампам. Мы абмяркоўвалі гэту паездку, наш візіт, магчымасць сустрэчы з Прэзідэнтам Беларусі, - сказаў ён. - Мэта нашага ўзаемадзеяння - гэта нармалізацыя двухбаковых адносін паміж Рэспублікай Беларусь і ЗША. Адна з галоўных мэт - зрабіць усё, каб эканамічнае, палітычнае ўзаемадзеянне паміж нашымі краінамі пашыралася і мацнела".

Джон Коўл задаволены вынікамі сустрэчы з Аляксандрам Лукашэнкам і ўпэўнены, што аналагічна імі будзе задаволены і Прэзідэнт Трамп, пасля таго як яму будзе даложана аб выніках.

"Прэзідэнты Беларусі і ЗША - гэта такія лідары, якія робяць усё для таго, каб нармалізаваць нашы адносіны і канцэнтравацца пры гэтым не на адрозненнях, а на агульных момантах", - заявіў Джон Коўл.

Цяперашнія адносіны паміж Беларуссю і ЗША ён назваў добрымі, але не выдатнымі. "Яшчэ можна зрабіць вельмі шмат для таго, каб гэтыя адносіны далей нармалізаваць, паляпшаць і гэтак далей. Мы хочам вярнуць наша пасольства ў Мінск. Мы хочам, каб паміж нашымі краінамі развіваліся эканамічныя адносіны, развіваўся гандаль. Калі нейкія разыходжанні і рознагалоссі паміж нашымі краінамі ёсць, то няхай яны застаюцца недзе ўнізе, іх не трэба выцягваць на паверхню. Мы гатовы, і Прэзідэнт Трамп гатовы, зрабіць усё для таго, каб нашы ўзаемаадносіны нармалізаваць канчаткова", - запэўніў прадстаўнік Прэзідэнта ЗША.

Што датычыцца вяртання пасольства ЗША ў Мінск, Джон Коўл не назваў канкрэтных дат, таму што гэта пакуль ляжыць у плоскасці перагаворнага працэсу. "Я ведаю, што мы хочам, каб пасольства вярнулася. Я ведаю, што яно вернецца. Гэта пытанне блізкай будучыні. Мы хочам мець пасла, мы хочам мець поўны склад пасольства тут. І мы будзем працаваць над гэтым", - заявіў прадстаўнік Прэзідэнта ЗША.

Самай галоўнай мэтай свайго чарговага візіту ў Мінск Джон Коўл назваў аб'яўленне аб поўным зняцці санкцый з беларускай авіякампаніі "Белавія". "Мы абсалютна безумоўна рухаемся ў правільным напрамку. Так, яшчэ засталіся абмежавальныя меры. Гэта працэс перагавораў. Перагаворы будуць прадаўжацца. Мы ідзём у правільным напрамку. Спатрэбіцца нейкі час для таго, каб гэтыя пытанні вырашыць. Але гэта працэс перагавораў, якія прадаўжаюцца", - дадаў ён.

Джон Коўл расказаў, што ў яго склаліся цудоўныя асабістыя адносіны з Прэзідэнтам Беларусі. "Мы дазваляем сабе жартаваць. Яшчэ раз паўтараю, што мы гатовы зрабіць усё для таго, каб адносіны нармалізаваць. А разыходжанні вырашаць па меры неабходнасці, але не выцягваць гэта ўсё на паверхню", - заявіў ён.

Прадстаўнік Прэзідэнта ЗША таксама нагадаў аб тэлефоннай размове Дональда Трампа з Аляксандрам Лукашэнкам, калі па дарозе на Аляску Прэзідэнт ЗША патэлефанаваў Прэзідэнту Беларусі з борта самалёта. "У іх была вельмі добрая размова. Мы рухаемся ў правільным напрамку", - упэўнены Джон Коўл.

версія для друку

зрабіць стартавай

дабавіць у выбранае