Прамовы і інтэрв’ю
Бяглоў: адносіны паміж Расіяй i Беларуссю сапраўды роднасныя i братэрскія
14 ліпеня, Мінск /Кар. БЕЛТА/. Адносіны паміж Расіяй і Беларуссю сапраўды роднасныя і братэрскія. Аб гэтым губернатар Санкт-Пецярбурга Аляксандр Бяглоў заявіў 14 ліпеня на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
Аляксандр Бяглоў падзяліўся, што гэтымі днямі прачытаў у адной з газет першае інтэрв'ю Аляксандра Лукашэнкі на пасадзе кіраўніка дзяржавы. Гэта значыць, матэрыял больш як 30-гадовай даўніны.
"Я прааналізаваў, што з таго часу і па сённяшні дзень вы практычна не змянілі сваім прынцыпам, тым рашэнням, якія вы тады прымалі і прымаеце сёння. Яны стабільныя і фундаментальныя. Гэта дало магчымасць заваяваць павагу сярод беларускага народа, сярод расіян і ў краінах СНД. Я цалкам падзяляю вашы словы аб тым, што адносіны паміж Рэспублікай Беларусь і Расіяй, Санкт-Пецярбургам сапраўды братэрскія, роднасныя. Таму ў нас усё і атрымліваецца", - заявіў губернатар.
Ён адзначыў, што трэнд у развіцці адносін паміж Беларуссю і Санкт-Пецярбургам задаюць прэзідэнты абедзвюх краін, што вельмі важна для рэгіёна.
"Той вектар узаемадзеяння паміж Санкт-Пецярбургам і Беларуссю, паміж нашымі прадпрыемствамі, які задалі вы і Прэзідэнт Расіі Уладзімір Пуцін, сёння ўвасабляецца ў жыццё. І мы дакладна выконваем даручэнні, якія дадзены нашымі прэзідэнтамі. Разважаць, разумнічаць не трэба - трэба проста браць і выконваць, тады будзе ўсё ў парадку, - падкрэсліў Аляксандр Бяглоў. - Вельмі важна, калі такі трэнд задаюць два прэзідэнты - гэта нам вельмі дапамагае".
У прыклад губернатар прывёў нядаўняе адкрыццё новага будынка генеральнага консульства Беларусі ў Санкт-Пецярбургу. Ён быў урачыста адкрыты ў цэнтры горада да Дня Незалежнасці Беларусі. "Ваша даручэнне і Уладзіміра Уладзіміравіча Пуціна цалкам выканана. Консульства працуе. Яно знаходзіцца за 10 хвілін ад Смольнага, таму я заўсёды генеральнаму консулу гавару: "Пешшу прайшоўся, заўсёды сядзем кубак гарбаты вып'ем і вырашым усе неабходныя пытанні", - адзначыў ён.
Размаўляючы з журналістамі пасля сустрэчы з кіраўніком дзяржавы, Аляксандр Бяглоў заявіў, што, нягледзячы на даўняе разнастайнае і шматпланавае супрацоўніцтва, Беларусь і Санкт-Пецярбург яшчэ не дасягнулі максімуму. Бакі маюць намер рухацца далей, і тавараабарот, які расце, таму пацвярджэнне.
"Не можа быць у адносінах нейкага максімуму. Няма нейкіх абмежаванняў, калі краіны, гарады, людзі адзін аднаго разумеюць і гатовы супрацоўнічаць", - сказаў губернатар Санкт-Пецярбурга.
Каб надаць дынаміку двухбаковаму супрацоўніцтву, важна інтэграваць вытворчасці, ствараючы канкурэнтаздольную прадукцыю, і ў цэлым дапаўняць адзін аднаго ва ўсіх сферах. Звычайны ж гандаль не дасць магчымасці дабіцца сур'ёзных вынікаў, лічыць Аляксандр Бяглоў.
"Для нас вельмі важна, што беларусы зрабілі свой электробус і зрабілі яго якасна, сучасна. І мы закупляем першую партыю беларускіх электробусаў для вуліц Санкт-Пецярбурга. Тое ж датычыцца аўтобусаў, тралейбусаў, пажарнай тэхнікі", - дадаў субяседнік.
Яшчэ адным важным напрамкам узаемадзеяння ён назваў пастаўкі беларускіх прадуктаў харчавання. "Прадукцыя якасная, "гостаўская", правераная. І яна заваёўвае папулярнасць не толькі ў Санкт-Пецярбургу, - заявіў Аляксандр Бяглоў. - Гэта інтэграцыя, узаемадзеянне ў нас ва ўсіх сферах. Гэта датычыцца і культуры, адукацыі, медыцыны. Па ўсіх пазіцыях у нас усё пазітыўна".
версія для друку
зрабіць стартавай
дабавіць у выбранае