Прамовы і інтэрв’ю

Андрэй Кабякоў адзначыў, што прамыя сувязі з суб'ектамі Расійскай Федэрацыі, гандлёва-эканамічныя, культурныя і іншыя адносіны - гэта фундамент супрацоўніцтва Беларусі і Расіі. Тавараабарот з Іркуцкай вобласцю ў 2015 годзе дасягнуў $115 млн, аднак у гэтым годзе намецілася тэндэнцыя да яго зніжэння. "Лічу, што ваш візіт будзе садзейнічаць таму, што мы адновім пазіцыі і выйдзем на той узровень узаемадзеяння, які адпавядае нашаму патэнцыялу", - сказаў прэм'ер-міністр.

Перспектыўным напрамкам узаемадзеяння можа быць навукова-тэхнічная і вытворчая кааперацыя. "У вас ідзе актыўнае стварэнне авіяцыйнага кластара, мы таксама хацелі б падставіць вам плячо, калі гэта неабходна", - дадаў Андрэй Кабякоў.

Беларусь разлічвае, што Іркуцкая вобласць як адзін з лідараў па здабычы карысных выкапняў прадоўжыць закупку тэхнікі БелАЗ. Шырокі спектр пасажырскай тэхнікі, у тым ліку на газаматорным паліве, можа прапанаваць МАЗ. Пры гэтым магчымы розныя схемы фінансавання куплі беларускай тэхнікі, у тым ліку лізінг, ільготнае крэдытаванне, субсідзіраванне працэнтных ставак.

Што датычыцца развіцця сферы сельскай гаспадаркі, то Беларусь гатова нарошчваць пастаўкі тэхнікі МТЗ і "Гомсельмаша". Іркуцкая вобласць таксама можа вывучыць беларускі вопыт стварэння аграгарадкоў і вытворчасцей у вёсцы, у тым ліку будаўніцтва малочнатаварных і жывёлагадоўчых ферм.

У Іркуцкай вобласці сур'ёзныя планы па развіцці камунальнай гаспадаркі. У сувязі з гэтым Беларусь можа прапанаваць практычна ўсе сучасныя віды камунальнай тэхнікі. Улічваючы амбіцыйныя планы па будаўніцтве і рэканструкцыі жылля ў расійскім рэгіёне, запатрабаванай можа быць прадукцыя прадпрыемства "Магілёўліфтмаш". "Думаю, што пры жаданні нашых партнёраў мы маглі б падтрымаць намаганні па стварэнні сумеснай зборачнай вытворчасці, паколькі не вельмі рацыянальна везці ліфты з-за аддаленасці рэгіёна. Можна было б забяспечыць пэўную ступень лакалізацыі ў расійскім рэгіёне і зрабіць добрую сумесную вытворчасць", - дадаў Андрэй Кабякоў. Іркуцкая вобласць таксама можа набыць беларускія электробусы і лесанарыхтоўчую тэхніку.

Па выніках сустрэчы падпісана пагадненне паміж урадамі Беларусі і Іркуцкай вобласці аб гандлёва-эканамічным, навукова-тэхнічным, культурным і гуманітарным супрацоўніцтве.