Прамовы і інтэрв’ю

Беларусь будзе пастаўляць калій у ЗША? Яўстаф'еў пра магчымую здзелку Мінска i Вашынгтона

Фота з архiва

17 снежня, Мінск /Кар. БЕЛТА/. Расійскі палітолаг кандыдат палітычных навук Дзмітрый Яўстаф'еў у праекце "У тэме" на YouTube-канале БЕЛТА падзяліўся меркаваннем аб магчымым супрацоўніцтве Беларусі і ЗША ў сферы калійных угнаенняў.

"Я лічу, што гэта магчыма. Больш таго, гэта будзе якраз абсалютна тое, што Трамп разумее як здзелку. Здзелку, яму выгадную: ён стварае (і ў гэтым ён абсалютна шчыры) магчымасць для Беларусі зарабляць грошы на амерыканскім рынку, на якім сапраўды можа ўзнікнуць сур'ёзны дэфіцыт угнаенняў", - сказаў Дзмітрый Яўстаф'еў.

Палітолаг падкрэсліў, што ў медыйнай прасторы ЗША і сярод амерыканскіх фермераў сапраўды абмяркоўваецца праблема магчымай няхваткі ўгнаенняў. Гэта звязана ў тым ліку з гандлёвымі пошлінамі, якія Прэзідэнт ЗША Дональд Трамп увёў у адносінах да Канады - асноўнага пастаўшчыка калійных угнаенняў у ЗША. У сувязі з гэтым Дзмітрый Яўстаф'еў звярнуў увагу на структуру нядаўняй здзелкі паміж Мінскам і Вашынгтонам.

"Трамп атрымлівае калійныя ўгнаенні. Беларусь, з яго пункту гледжання, атрымлівае дадатковыя даходы. І пры гэтым Беларусь аддае тое, што Трампу не трэба, - нібы палітзняволеных. Гэта не трэба ні Трампу, ні Беларусі. А аддаюць іх у Еўропу - туды, дзе Трампа палітычны бок справы цікавіць пастолькі-паколькі", - адзначыў ён.

Дзмітрый Яўстаф'еў выказаў упэўненасць у тым, што аналагічных падыходаў кіраўнік Белага дома будзе прытрымлівацца і ва ўсіх астатніх напрамках, у тым ліку ў адносінах з Саюзнай дзяржавай.

версія для друку

зрабіць стартавай

дабавіць у выбранае