Прамовы і інтэрв’ю

29 кастрычніка, Мінск /Таццяна Пастушэнка - БЕЛТА/. Беларусь гатова да самых актыўных крокаў для пашырэння супрацоўніцтва з Іракам. Аб гэтым заявіў сёння старшыня Палаты прадстаўнікоў Нацыянальнага сходу Беларусі Уладзімір Андрэйчанка ў ходзе сустрэчы з Надзвычайным і Паўнамоцным Паслом Ірака ў Беларусі Хайдарам Хадзі, перадае карэспандэнт БЕЛТА.

"Беларусь высока цэніць дружалюбныя адносіны паміж нашымі краінамі, і мы гатовы да самых актыўных крокаў для пашырэння супрацоўніцтва", - сказаў Уладзімір Андрэйчанка. Пры гэтым спікер адзначыў, што на сённяшні дзень узаемадзеянне паміж дзвюма краінамі не адпавядае існуючаму патэнцыялу. У стадыі станаўлення знаходзіцца дагаворна-прававая база, а без адпаведнага нарматыўнага забеспячэння рухацца наперад складана. Ён таксама звярнуў увагу на нязначны гандлёвы абарот.

"Разам з тым мы лічым, што ў нас няма ніякіх перашкод для пашырэння супрацоўніцтва", - сказаў старшыня Палаты прадстаўнікоў. Паводле яго слоў, важную ролю ў гэтых пытаннях можа адыграць актывізацыя міжпарламенцкага дыялогу. "Не магу сказаць, што апошнім часам мы не ўзаемадзейнічаем на міжпарламенцкім узроўні, мы прымалі з візітамі дэлегацыі Ірака, а Ірак у сваю чаргу прымаў дэлегацыі з Беларусі. Нядрэнна наладжана супрацоўніцтва з пасольствам Ірака ў Беларусі", - сказаў спікер. Акрамя таго, паводле яго слоў, беларускі парламент накіраваў запрашэнне спікеру парламента Ірака наведаць з візітам Беларусь у зручны для яго час. "Мы лічым, што ў час гэтага візіту можна было б падпісаць пагадненне аб супрацоўніцтве паміж парламентамі дзвюх краін, і гэта пагадненне ў нейкай ступені можа надаць імпульс узаемадзеянню і ў іншых сферах", - сказаў ён.

Старшыня Палаты прадстаўнікоў праінфармаваў дыпламата аб тым, што ў беларускім парламенце практыкуецца стварэнне груп па супрацоўніцтве з парламентамі іншых дзяржаў, на сённяшні дзень такіх груп дзейнічае 56. На думку спікера, аналагічныя групы маглі б з'явіцца ў парламентах дзвюх краін, прычым гэту работу можна правесці скаардынавана.

Звяртаючыся да пасла, Уладзімір Андрэйчанка таксама дадаў: "Мы бачым, колькі намаганняў вы прыкладаеце для развіцця супрацоўніцтва і ўмацавання дружалюбных адносін паміж Беларуссю і Іракам". Паводле яго слоў, дэпутацкі корпус заўсёды будзе аказваць садзейнічанне для рэалізацыі розных ініцыятыў, якія паступаюць з боку Ірака.

У сваю чаргу Хайдар Хадзі пагадзіўся з тым, што тавараабарот паміж Беларуссю і Іракам склаўся невялікі і ён не адпавядае існуючаму патэнцыялу, аднак іракскі бок актыўна працуе над яго павышэннем. Так, у ходзе візіту дэлегацыі прадстаўнікоў дзелавых колаў Ірака на чале са старшынёй саюза ГПП у чэрвені 2014 года быў падпісаны Мемарандум аб узаемаразуменні паміж БелГПП і Федэрацыяй гандлёвых палат Ірака. Акрамя таго, паводле яго слоў, цяпер бакамі ўзгоднены і можа быць падпісаны ў ходзе візіту высокага ўзроўню Мемарандум аб узаемаразуменні паміж Міністэрствам сельскай гаспадаркі і харчавання Беларусі і Міністэрствам сельскай гаспадаркі Ірака (беларускім бокам ужо завершаны ўнутрыдзяржаўныя працэдуры, неабходныя для падпісання дакумента). Дыпламат выказаў надзею, што гэты і іншыя важныя дакументы будуць падпісаны бакамі ў бліжэйшы час ў ходзе плануемых візітаў міністраў розных ведамстваў Ірака ў Беларусь.

Хайдар Хадзі таксама падкрэсліў, што Ірак лічыць Беларусь адным з галоўных партнёраў у Еўропе. Паводле яго слоў, іракскі ўрад высока цэніць падтрымку Беларусі ў барацьбе супраць тэрарызму. У чэрвені 2014 года Беларусь асудзіла дзеянні тэрарыстычных груп у Іраку, якія прывялі да гібелі тысяч людзей, прымусілі сотні тысяч іракскіх грамадзян шукаць прыстанішча ў іншых правінцыях.