Прамовы і інтэрв’ю

Аналітык: Беларусь паслядоўна прытрымліваецца пазіцыі максімальнай гуманізацыі міжнародных адносін

Фота з архiва

13 жніўня, Брэст /Кар. БЕЛТА/. Беларусь на міжнароднай арэне паслядоўна прытрымліваецца пазіцыі чалавекамернасці міжнародных адносін і неабходнасці іх максімальнай гуманізацыі. Такое меркаванне ў размове з карэспандэнтам БЕЛТА выказаў аналітык аддзялення БІСД па Брэсцкай вобласці Сяргей Жук, каменціруючы інтэрв'ю кіраўніка дзяржавы амерыканскаму часопісу Time.

Эксперт звярнуў увагу, што за апошнія некалькі месяцаў Аляксандр Лукашэнка даў другое інтэрв'ю амерыканскім медыя. У пачатку года адбылася грунтоўная размова з вядомым блогерам Марыа Наўфалам, у жніўні выйшла інтэрв'ю Прэзідэнта Беларусі часопісу Time.

"Безумоўна, фармат прамой камунікацыі з амерыканскай аўдыторыяй і палітычнымі элітамі з'яўляецца важным з пункту гледжання данясення афіцыйнай пазіцыі Рэспублікі Беларусь, асабліва на сучасным этапе інтэнсіфікацыі кантактаў. Ён становіцца адным з інструментаў разбурэння заходніх міфаў пра нібыта фактычную акупацыю Беларусі Расіяй, дружбу з Кітаем як сродку процідзеяння расійскаму ўплыву, дазваляе даносіць да слухачоў рэальную ўнутрыпалітычную сітуацыю ў краіне. Сумленная і адкрытая пазіцыя кіраўніка дзяржавы, несумненна, у перспектыве акажа пазітыўны ўплыў на дынаміку на беларуска-амерыканскім перагаворным трэку", - лічыць аналітык.

У інтэрв'ю Аляксандр Лукашэнка асаблівы акцэнт зрабіў на гуманітарным складніку міжнародных адносін і неабходнасці іх гуманізацыі ў цэлым. Гэта канцэптуальная пазіцыя Беларусі. "У заходніх краінах практычна цалкам дамінуюць неаліберальны і рэалістычны падыходы. Іх асноўная праблема - практычна поўная адсутнасць уліку меркавання народаў як палітычных суб'ектаў. Інакш кажучы, чалавек у прынцыпе не ўключаецца ва "ўраўненне" міжнародных адносін. Таму невыпадкова Прэзідэнтам не раз падкрэслівалася неабходнасць змянення прынцыпаў і правіл міжнародных адносін і фарміравання гарманічнай сістэмы, якая перш за ўсё дзейнічала б у інтарэсах людзей, а не асобных інстытутаў і дзяржаў", - заўважыў Сяргей Жук.

У гэтым кантэксце Аляксандр Лукашэнка выказаўся пра ўкраінскі крызіс. Ён звярнуў увагу на ролю Беларусі ў прыёме бежанцаў, у арганізацыі абменаў, на гатоўнасць і далей быць пляцоўкай для перагавораў у любым фармаце.

"Важна разумець, што для Беларусі гэты канфлікт, у адрозненне ад заходніх дзяржаў, не стрэлачкі на карце або пляцоўка процістаяння з Расіяй. Гэта кровапралітная барацьба паміж блізкімі народамі, з якімі нас звязваюць агульная гісторыя і многія тысячы роднасных сувязей. Таму кіраўнік дзяржавы перш за ўсё канцэнтраваўся на пытаннях і праблемах людзей, якія пакутуюць ад канфлікту. Адна з найбольш канцэптуальных пазіцый беларускага лідара: "Мне блізкія ўкраінцы, блізкія расіяне. Гэта родныя людзі. Я хачу, каб тут было ўсё ў парадку. І там, дзе яны не могуць сустракацца адзін з адным, паміж імі працуюць беларусы", - сказаў аналітык. Ён дадаў, што менавіта таму складаны шлях дыялогу, узаемных уступак для захавання жыццяў людзей цяпер з'яўляецца вельмі важным. Ключавым фактарам яго паспяховасці становіцца палітычная воля лідараў дзяржаў, іх здольнасць прымаць няпростыя рашэнні для хутчэйшага ўстанаўлення трывалага міру.

"Чалавекамернасць міжнародных адносін і неабходнасць іх максімальнай гуманізацыі - паслядоўная пазіцыя беларускай дзяржавы на міжнароднай арэне. І інтэрв'ю Прэзідэнта - яскравае таму пацвярджэнне", - рэзюмаваў Сяргей Жук.

версія для друку

зрабіць стартавай

дабавіць у выбранае