Прамовы і інтэрв’ю

У заяве адзначаецца, што ўдзельнікі трохбаковай кантактнай групы (ТКГ) прыязджалі 31 студзеня ў Мінск на кансультацыі з прадстаўнікамі самаабвешчаных утварэнняў, маючы падрыхтаваны ўжо дэталёвы план з канкрэтнымі пазіцыямі па рэалізацыі мінскага пратакола і мінскага мемарандума (падпісаных у верасні 2014 года), якія "прадаўжаюць быць незаменнай асновай для любога мірнага ўрэгулявання".

Пры гэтым у заяве ТКГ АБСЕ выказваецца шкадаванне наконт таго, што тыя прадстаўнікі ДНР і ЛНР, якія падпісалі гэтыя два дакументы ў верасні 2014 года ў Мінску, не прынялі ўдзел у перагаворах 31 студзеня. Хаця яны былі персанальна запрошаны ТКГ. Як сцвярджаецца ў прэс-рэлізе, прадстаўнікі самаабвешчаных рэспублік, якія прыязджалі ў Мінск на чарговы раўнд перагавораў 31 студзеня, былі не ў стане абмяркоўваць прапановы, вылучаныя кантактнай групай. Больш таго, удзельнікі ТКГ лічаць, што гэтыя людзі фактычна нават не былі падрыхтаваны да абмеркавання выканання дамоўленасцей аб спыненні агню і адводзе цяжкіх узбраенняў.

"Замест гэтага яны прапанавалі перагледзець мінскі пратакол і мінскі мемарандум. Сустрэча была перанесена", - таксама гаворыцца ў заяве групы.

"ТКГ застаецца адкрытай для прадаўжэння кансультацый у любы час. З прычыны сур'ёзнага пагаршэння сітуацыі (на паўднёвым усходзе Украіны. - Заўвага БЕЛТА) і росту колькасці ахвяр, ТКГ заклікае ўсіх удзельнікаў да адказнага ўдзелу ў поўным выкананні мінскіх дакументаў без далейшых затрымак", - заяўляюць удзельнікі групы па Украіне.