Падзеі, факты, анонсы

"Жамчужыны Беларусі". Для расійскіх турыстаў запусцілі новы чыгуначны праект

Фота БЧ

26 жніўня, Мінск /Кар. БЕЛТА/. Турыстычны цэнтр "Дартур" Беларускай чыгункі прыняў першую групу турыстаў з Расійскай Федэрацыі ў рамках новага чыгуначнага праекта "Жамчужыны Беларусі". Аб гэтым паведамілі БЕЛТА ў прэс-цэнтры БЧ.

Праект распрацаваны сумесна з расійскімі калегамі з ААТ "РЧ", каб пашырыць чыгуначныя маршруты паміж Рэспублікай Беларусь і Расійскай Федэрацыяй.

Госці з Расійскай Федэрацыі на працягу двух дзён зрабілі цікавае падарожжа з Масквы ў Гомель, Магілёў, Шклоў і Александрыю. Насычаная турыстычная праграма пілотнага праекта прадугледжвала знаёмства з мясцовымі славутасцямі, гісторыяй, культурай і традыцыямі краіны, дэгустацыю страў нацыянальнай кухні.

Так, у горадзе над Сожам турысты наведалі Гомельскі палацава-паркавы ансамбль, у Магілёве ўбачылі старажытныя фрэскі кафедральнага касцёла Успення Дзевы Марыі і святога Станіслава і Свята-Мікольскага жаночага манастыра, пабывалі ў Магілёўскім абласным краязнаўчым музеі, на Алеі Герояў і ў мемарыяльным комплексе "Буйніцкае поле".

Акрамя таго, госці наведалі малую радзіму Прэзідэнта - аграгарадок Александрыя. У школе, дзе вучыўся Аляксандр Лукашэнка, для іх арганізавалі экскурсію. Таксама паказалі знакамітую Трафімаву крыніцу з гаючай вадой.

У час чыгуначнага падарожжа расійскія турысты азнаёміліся з работай беларускіх нафтавікоў, ацанілі ўнікальныя вырабы з лазы і керамікі ў Цэнтры народнай творчасці і рамёстваў у гарадскім пасёлку Копысь.

"Улічваючы станоўчыя водгукі, турыстычны цэнтр "Дартур" БЧ плануе прадоўжыць развіццё і рэалізацыю праекта "Жамчужыны Беларусі", - адзначылі ў прэс-цэнтры.

версія для друку

зрабіць стартавай

дабавіць у выбранае