Падзеі, факты, анонсы

Выставу грашовых знакаў часоў Другой сусветнай вайны адкрылі ў музеі гісторыі ВАВ

21 кастрычніка, Мінск /Кар. БЕЛТА/. Выстава "Цана вайны" адкрылася ў Беларускім дзяржаўным музеі гісторыі Вялікай Айчыннай вайны, перадае карэспандэнт БЕЛТА.

У аснове экспазіцыі - грашовыя знакі, аблігацыі, манеты краін антыгітлераўскай кааліцыі і іх саюзнікаў - Савецкага Саюза, ЗША, Вялікабрытаніі, Францыі, а таксама краін "восі" - Германіі, Японіі, Італіі.

Куратар выставы, загадчык аддзела рэчавых крыніц музея Людміла Пракапенка адзначыла, што да стварэння экспазіцыі іх падштурхнулі новыя музейныя паступленні апошніх двух гадоў. "Любыя падзеі, якія адбываюцца ў свеце, у сваёй аснове маюць фінансы, для вядзення любой вайны патрэбна фінансавая падушка, таму праз грашовыя знакі мы вырашылі паказаць, як фінансавалася вайна. Большая частка выставы прысвечана менавіта банкаўскай сферы і фінансавым рэсурсам розных краін у час вайны. Яны адрозніваліся па аб'ёме, таму што ў перадваенны перыяд СССР, еўрапейскія краіны і ЗША знаходзіліся ў розных эканамічных сітуацыях", - дадала Людміла Пракапенка.

На выставе можна даведацца, што рабілі ўрады розных краін, каб забяспечыць матэрыяльна-тэхнічную базу для сваіх армій і вядзення баявых дзеянняў. Акрамя таго, экспазіцыю дапаўняюць калекцыі з фондавых музеяў: абмундзіраванне, узбраенне, амуніцыя розных дзяржаў.

"Гэта тэма спецыфічная і, магчыма, цікава не такому шырокаму колу людзей. Але тое, як людзі жылі і плацілі ў час вайны, - таксама частка гісторыі. Для мяне асабліва цікавымі былі нямецкія акцыі. Часцей за ўсё гэта акцыі прадпрыемстваў, якія пачыналі сваю гісторыю як грамадзянскія, але ў эпоху фашызму сталі працаваць на вермахт. Вывучаючы іх гісторыю, можна прасачыць перапляценне мірнага і ваеннага жыцця, убачыць перараджэнне гэтых прадпрыемстваў, паколькі яны пачалі выпускаць прадукцыю, якая несла смерць людзям", - падкрэсліла куратар выставы.

Першы намеснік міністра культуры Дзмітрый Шляхцін назваў праект унікальным для беларускіх музеяў: "Мы шмат гаворым аб героях, баявых дзеяннях, партызанскім руху. Але не павінны забываць, што Другая сусветная вайна - гэта яшчэ і процістаянне эканамічных сістэм. Савецкі Саюз - краіна без фондавага рынку, якая мае пэўныя абмежаванні інструментаў для прыцягнення грашовых сродкаў для фінансавання расходаў - тым не менш змагла забяспечыць практычна ў поўным аб'ёме свае патрэбнасці. Гэта вельмі важна".

Экспазіцыя будзе працаваць да 22 снежня.

версія для друку

зрабіць стартавай

дабавіць у выбранае