Падзеі, факты, анонсы

Выстава жывапісу "З любоўю да Беларусі" Аляксандра Пакацілы адкрываецца ў Гомелі

1 лютага, Гомель /Кар. БЕЛТА/. Выстава жывапісу "З любоўю да Беларусі" Аляксандра Пакацілы адкрываецца сёння ў Гомелі ў музеі аўтографа Цэнтральнай гарадской бібліятэкі імя А.І. Герцэна, паведамілі карэспандэнту БЕЛТА ў сетцы публічных бібліятэк горада Гомеля.

Наведвальнікі ўбачаць палотны, напісаныя алеем. Гомельскі жывапісец у сваіх творах перадае каларыт вясковай прыроды з бязмежнымі палямі, некранутымі лясамі і балотамі ў летнюю пару года. 

"У творчасці мастака пераважаюць яркія тоны. Кожная з работ мае непаўторнае адценне, сакавітасць фарбаў. Пейзажы дораць спакой душы і абуджаюць лепшыя ўспаміны пра лета ў вёсцы. Ад твораў вее і прахалоднай расой, і паўдзённай спякотай, і пахам летніх траў. Карціны перадаюць шум дрэў, спевы птушак і спакойную цішыню", - расказалі ў бібліятэцы.

Аляксандр Пакаціла нарадзіўся ў 1987 годзе ў пасёлку Перамога Гомельскага раёна. Скончыў спецыяльную агульнаадукацыйную школу нумар 70 Гомеля для вучняў з парушэннем слыху. Мастацкую адукацыю атрымаў у Гомельскім дзяржаўным мастацкім каледжы і Беларускай дзяржаўнай акадэміі мастацтваў. Цяпер Аляксандр працуе выкладчыкам у Дзіцячай мастацкай школе мастацтваў Гомеля, дзе вядзе заняткі ў класе дзяцей з парушэннем слыху, настаўнікам выяўленчага мастацтва ў САШ нумар 70 Гомеля для вучняў з парушэннем слыху, навучае дарослых ва ўзорнай студыі выяўленчага мастацтва "Палітра" Цэнтра інклюзіўнай культуры. Мастак не раз быў удзельнікам міжнародных пленэраў глухіх мастакоў, розных выстаў.

Жывапісныя работы на выставе "З любоўю да Беларусі" можна ўбачыць да 3 сакавіка. Уваход свабодны.

версія для друку

зрабіць стартавай

дабавіць у выбранае