Падзеі, факты, анонсы
Выстава "Мінскі настрой" адкрылася ў Галерэі мастацтваў Міхаіла Савіцкага
Фота minskmuseum.by
10 жніўня, Мінск /Кар. БЕЛТА/. Сёння ў Галерэі мастацтваў Міхаіла Савіцкага адкрываецца мастацкая выстава "Мінскі настрой". Выстава арганізавана Музеем гісторыі горада Мінска сумесна з Беларускім саюзам мастакоў, паведамляе БЕЛТА са спасылкай на інтэрнэт-партал Музея гісторыі горада Мінска.
У экспазіцыі прадстаўлена больш за 60 твораў жывапісу і графікі ў жанрах гарадскога пейзажа, партрэта і тэматычнай карціны. Мінск і мінчане паказаны на палотнах беларускіх народных мастакоў Вашчанкі і Паплаўскага, а таксама такіх вядомых аўтараў, як Герус, Тычына, Кудрэвіч, Басаў, Бараноўскі, Пасюкевіч, Крол і многія іншыя.
"Гледзячы на пейзажы, наведвальнік адкрые для сябе горад па-новаму: пазнае знаёмыя месцы, вуліцы і будынкі, параўнае іх з сучасным Мінскам і сфарміруе ўяўленне пра атмасферу горада мінулых дзесяцігоддзяў. Галоўная асаблівасць работ выставы ў тым, што яны здольны перадаць настрой горада. Гледзячы на графічныя і жывапісныя работы, вы абавязкова адчуеце цёплае летняе паветра гарадскога вечара або дыханне студзеньскага марозу на навагоднім катку, раздзеліце радасць сустрэчы са студэнтамі на летняй практыцы або адзіноту пажылога мінчаніна, які назірае за горадам з акна сваёй кватэры", - пракаменціравалі складзеную экспазіцыю ў Музеі гісторыі горада Мінска.
Работы выставы вызначаюцца разнастайнасцю сюжэтаў, настрой горада змяняецца ад карціны да карціны. На палотнах можна ўбачыць сілуэты гістарычнага цэнтра Мінска і жылых кварталаў горада, азнаёміцца з пасляваеннай архітэктурай сталіцы. На некаторых пейзажах вуліцы Мінска паўстаюць асабліва святочнымі. Настрой горада перадаецца праз малюнак эпізодаў жыцця гараджан: танцы на летняй пляцоўцы, вячэрняе катанне на каньках, вяртанне ў горад з паездкі.
Асобны раздзел выставы прысвечаны творчасці Анатоля Тычыны. У экспазіцыі прадстаўлены яго літаграфіі, лінагравюры і акварэльныя замалёўкі беларускай сталіцы 1970-х і 1980-х гадоў. Гэты шматгранны мастак стварыў вобраз Мінска як ідэальнага горада-фенікса, які адрадзіўся з руін.
На выставе прадугледжана відэазона, дзе можна паглядзець дакументальныя фільмы пра горад.
версія для друку
зрабіць стартавай
дабавіць у выбранае