Афіцыйны сайт Рэспублікі Беларусь
Навіны
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Навіны | Падзеі, факты, анонсы

Падзеі, факты, анонсы

31 Dec 2020

Выстаўку калядных батлеек адкрылі ў Брэсце

Выстаўку калядных батлеек адкрылі ў Брэсце

31 снежня, Брэст /Кар. БЕЛТА/. Выстаўку "Калядная батлейка" адкрылі 30 снежня ў філіяле Брэсцкага абласнога краязнаўчага музея - музеі "Выратаваныя мастацкія каштоўнасці", перадае карэспандэнт БЕЛТА.

Пернікавыя, папяровыя, з пластыліну, саломы, іншых прыродных матэрыялаў - на вернісажы прадставілі каля дзясятка аб'ёмных батлейкавых кампазіцый. Адны выкананы выхаванцамі нядзельных школ, іншыя - навучэнцамі мастацкіх студый, творчых аб'яднанняў. У гэтай творчай рабоце дзецям з захапленнем дапамагалі дарослыя - педагогі і бацькі. Цэнтральнае месца ў экспазіцыі заслужана займае адноўленая ў цесце кананічная сцэна каляднага сюжэта ад Свята-Сімяонаўскага кафедральнага сабора. Толькі крыху ўступае гэтай кампазіцыі памерам, але не водарам такая ж ядомая скульптура са Свята-Раства-Багародзічнага жаночага манастыра.

"Традыцыя стварэння батлеек напярэдадні Каляд існуе шмат гадоў ва ўсім свеце. Кожны можа зрабіць батлейку ў сябе дома разам са сваёй сям'ёй з любых матэрыялаў. Але самая смачная, безумоўна, з пернікавага цеста, якую пасля свят з'ядалі", - расказала вядучы навуковы супрацоўнік музея Наталля Пятрова.

На выстаўцы прадстаўлены і іншыя творчыя работы на тэму навагодніх свят - усяго каля сотні экспанатаў. Гэта абразы XIX стагоддзя, якія ўшаноўваюцца напярэдадні і ў час свята Раства Хрыстовага, з фондаў абласнога краязнаўчага музея і святочныя абразы сучасных брэсцкіх іканапісцаў. З прыватных калекцый экспануюцца навагоднія цацкі сярэдзіны мінулага стагоддзя і вінтажныя лялькі, створаныя ў традыцыях XIX стагоддзя. Захапленне ўдзельнікаў вернісажу выклікала рэльефнае пано з дрэва брэсцкага майстра Юрыя Чарнёва "Ля лукамор'я дуб зялёны", створанае каля 50 гадоў таму. Экспазіцыю дапаўняюць карціны прафесійных і самадзейных мастакоў.

Выстаўка калядных батлеек у музеі "Выратаваныя мастацкія каштоўнасці" будзе экспанавацца па 31 студзеня. Акрамя таго, на працягу месяца там пройдуць майстар-класы па клеявой тэхніцы вырабу навагодніх паштовак і калядных вянкоў.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі