Падзеі, факты, анонсы
Выстаўка-прэзентацыя праектаў конкурсу "100 ідэй для Беларусі" пройдзе 24 лютага
23 лютага, Мінск /Кар. БЕЛТА/. Выстаўка-прэзентацыя і абарона праектаў конкурсу "100 ідэй для Беларусі" пройдзе 24 лютага ў Мінску ў НВЦ "Белэкспа" (вул. Я.Купалы, 27), паведаміла БЕЛТА каардынатар праекта, старшыня Цэнтральнай кантрольнай камісіі ГА "Беларускі рэспубліканскі саюз моладзі" Алеся Віннік.
Экспазіцыю выстаўкі-прэзентацыі навукова-тэхнічных распрацовак і інавацыйных праектаў моладзі краіны складуць 100 аўтарскіх праектаў. Усе яны атрымалі ў 2014 годзе станоўчую ацэнку абласных і мінскага гарадскога экспертных саветаў конкурсу "100 ідэй для Беларусі".
У прыватнасці, будзе прадстаўлены праект "Матэрыял для стварэння палос проціслізгацення пешаходаў на прыпыначных пунктах і пешаходных пераходах" аспіранта Інстытута агульнай і неарганічнай хіміі НАН Беларусі Дзмітрыя Бусла. Таксама гледачы могуць убачыць аўтарскі праект спецыяліста па таваразнаўстве і экспертызе харчовых прадуктаў Вольгі Астальцавай "Распрацоўка тэхналогіі вытворчасці спецыялізаваных хлебабулачных вырабаў для прафілактыкі лішняй вагі". Сярод праектаў будзе распрацоўка інжынера-тэхнолага лакаматыўнага дэпо горада Ліды Аляксандра Зінькевіча "Інавацыйны спосаб аднаўлення манаблокаў дызеля М756", а таксама праект навучэнца СШ нумар 12 Гродна Леаніда Ганчара "Віртуальны музей тэхнікі часоў Вялікай Айчыннай вайны".
Выставачны комплекс будзе разбіты на некалькі інтэрактыўных пляцовак: прамысловыя тэхналогіі і вытворчасць; медыцына, ахова здароўя і біятэхналогіі;
IT-праекты (інфармацыйныя тэхналогіі); робататэхніка. "Робаты са штучным інтэлектам арганізуюць сапраўднае шоу. Яны не толькі будуць самастойна шукаць выхад са змадэляванага лабірынта, але і дадуць фору хакеістам-прафесіяналам, спрытна арудуючы клюшкай і забіваючы галы ў вароты галкіпера. Кожны жадаючы зможа паспрабаваць свае сілы ў кіраванні робатам, а таксама стварэнні і запуску ўласнай мадэлі кібарга", - сказала Алеся Віннік.У час мерапрыемства будзе працаваць стартап-школа, дзе вядомыя бізнесмены падзеляцца з аўтарамі праектаў сваёй гісторыяй поспехаў.
"100 ідэй для Беларусі" - рэспубліканскі маладзёжны конкурс БРСМ, асноўная задача якога заключаецца ў актывізацыі інавацыйнай дзейнасці і прафесійнай мабільнасці моладзі, стварэнні і пашырэнні канкрэтных інавацыйных праектаў і перспектыўных навукова-тэхнічных распрацовак.
версія для друку
зрабіць стартавай
дабавіць у выбранае