Падзеі, факты, анонсы

Экспазіцыя ўключае матэрыялы з фондаў Дома-музея Якуба Коласа: факсімільнае выданне газеты "Наша доля" з першай публікацыяй паэта, рукапісы пісем Якуба Коласа ў рэдакцыю "Нашай нівы", ілюстрацыі да твораў Якуба Коласа беларускіх мастакоў Васіля Шаранговіча, Анатоля Волкава, Анатоля Александровіча і іншых, фатаграфіі паэта перыяду знаходжання ў Вільнюсе, выданні 1920-1940 гадоў, газеты "Літаратура і мастацтва", віленскія выданні твораў паэта розных гадоў, перапіска пісьменнікаў Літвы з Якубам Коласам, асабістыя рэчы з сям'і Каменскіх, друкаваныя выданні, а таксама творы Якуба Коласа ў перакладзе на літоўскую мову з фондаў Літаратурнага музея А.С.Пушкіна.

Жыццё і творчасць Якуба Коласа з 1906 года звязана з цяперашняй сталіцай Літвы: 1 верасня ў газеце "Наша доля" адбыўся літаратурны дэбют Канстанціна Міхайлавіча Міцкевіча. Верш "Наш родны край", напісаны пад уражаннем ад падзей нелегальнага сходу настаўнікаў, быў надрукаваны пад псеўданімам Якуб Колас. Сувязь Якуба Коласа з Вільнюсам не абмяжоўваецца толькі яго кароткачасовым пражываннем у перыяд 1907-1908 гг., калі ён працаваў у рэдакцыі "Нашай нівы". У прыгарадзе Вільнюса, Павільнюс, жыла яго будучая жонка Марыя Дзмітрыеўна Каменская. Яе маці Марыя Цімафееўна Каменская пабудавала ў Віленскай чыгуначнай калоніі дом для сваёй дачкі. Менавіта сюды ў 1913 годзе ў час вясельнага падарожжа прыязджала маладая сям'я. У Вільнюсе ў чэрвені 1913 года адбылася другая сустрэча Якуба Коласа і Янкі Купалы. Якуб Колас і Марыя Дзмітрыеўна жылі ў Віленскай чыгуначнай калоніі летам 1913-1915 гадоў. Адсюль паэт хадзіў у Вільню да Янкі Купалы ў рэдакцыю "Нашай нівы". Сустракаўся з выдаўцамі, дамаўляўся аб выданні зборніка прозы "Родныя з'явы". Якуб Колас успамінаў, што Янка Купала некалькі разоў наведваў яго ў ваколіцах Вільнюса.