Падзеі, факты, анонсы

26 верасня, Мінск /Кар. БЕЛТА/. Нацыянальны акадэмічны Вялікі тэатр оперы і балета Беларусі ўпершыню ўдзельнічае ў міжнародным Брукнераўскім фестывалі ў Аўстрыі, паведамілі карэспандэнту БЕЛТА ў тэатры.

У фестывалі, які штогод праходзіць у Лінцы ў гонар кампазітара Антона Брукнера, прымуць удзел больш за 100 беларускіх артыстаў Вялікага тэатра. Пачынаючы з 1974 года, калі адбыўся першы музычны форум, яго арганізатары кожны раз спрабуюць зрабіць нешта асаблівае, што вылучала б гэта мерапрыемства сярод усіх астатніх.

Мастацкі кіраўнік фестывалю Ханс-Іаахім Фрай, з якім Вялікі тэатр Беларусі звязваюць працяглыя дружалюбныя адносіны (вясной бягучага года Фрай у якасці рэжысёра паставіў на беларускай сцэне оперы В.А. Моцарта "Чароўная флейта"), не сумняваецца ва ўнікальнасці свайго тварэння: "Гэта адзін з чатырох важнейшых музычных форумаў Аўстрыі нараўне з музычнымі марафонамі ў Зальцбургу, Брэгенцы і Вене. Брукнераўскі фестываль прадаўжаецца чатыры тыдні, за гэты час у Лінцы праходзіць прыкладна 50 канцэртаў, уключаючы оперныя і балетныя спектаклі".

У канцэртнай зале "Брукнерхаус" 1 і 2 кастрычніка выступяць салісты оперы, артысты хору (галоўны хормайстар - Ніна Ламановіч) і аркестра Вялікага тэатра. За дырыжорскім пультам два вечары запар - уладальнік медаля Францыска Скарыны Андрэй Галанаў. Гледачы 1 кастрычніка пачуюць "Серэнаду для струннага аркестра" П. Чайкоўскага, "Класічную сімфонію" С. Пракоф'ева, сцэны і арыі з опер "Руслан і Людміла" М. Глінкі, "Яўген Анегін" і "Пікавая дама" П. Чайкоўскага, "Барыс Гадуноў" М. Мусаргскага, "Алека" С. Рахманінава.

У першым аддзяленні 2 кастрычніка будзе прадстаўлена канцэртнае выкананне оперы "Іаланта" П. Чайкоўскага (Іаланта - Настасся Масквіна, Вадэмон - Эдуард Мартынюк, Роберт - Ілья Сільчукоў, Рэне - Андрэй Валенцій), у другім - кантата Г. Свірыдава "Курскія песні" для хору і сімфанічнага аркестра, а таксама сцэны з оперы А. Барадзіна "Князь Ігар" (фінал 1-й дзеі).