Падзеі, факты, анонсы

Вялікі тэатр Беларусі пакажа прэм'еру дзіцячай оперы "Пінокіа" 19 снежня

Фота з архiва

8 снежня, Мінск /Кар. БЕЛТА/. Прэм'ера дзіцячай оперы "Пінокіа" Глорыі Бруні адбудзецца 19 снежня ў Вялікім тэатры Беларусі, паведаміла БЕЛТА вядучы рэдактар службы маркетынгавых камунікацый тэатра Алена Балабановіч.

"Упершыню опера "Пінокіа" прагучала ў Гамбургу ў 2008 годзе. Потым яе ставілі тэатры ў Неапалі, Парме, Лондане і іншых гарадах Еўропы. Казачная гісторыя з'явіцца на мінскай сцэне ў дні зімовых канікулаў. За яе ўвасабленне ўзяліся беларускія пастаноўшчыкі: дырыжор Уладзімір Авадок, рэжысёр Наталля Бараноўская і мастак Любоў Сідзельнікава", - расказала Алена Балабановіч.

Для Наталлі Бараноўскай спектакль стане першай рэжысёрскай работай на сцэне тэатра. На яе думку, маладым артыстам будзе цікава паўдзельнічаць у казцы, паколькі ў оперы кожны вобраз - яркі і запамінальны і пры выкананні патрабуе не толькі вакальнага таленту, але і сур'ёзнай акцёрскай гульні. "Гісторыя аб драўлянай ляльцы, якая стала чалавекам, па-ранейшаму актуальная. Мы ўсе робім памылкі, але, выпраўляючы іх, расцём. Так і Пінокіа, спатыкаючыся, усё ж прыходзіць да таго, што ахвяруе сабой у імя другога чалавека", - сказала рэжысёр.

Лібрэта оперы напісалі Урсел Шэфлер і Наталля Бараноўская па матывах казкі Карла Калодзі. Балетмайстрам-пастаноўшчыкам стаў лаўрэат міжнародных конкурсаў Сяргей Мікель, мастаком па святле - Людміла Кунаш, мастаком па камп'ютарнай графіцы - Дзяніс Асташонак. Гледачы ўбачаць маляўнічыя дэкарацыі, яркія касцюмы, выкарыстанне відэапраекцый і мультыплікацыйны рад.

версія для друку

зрабіць стартавай

дабавіць у выбранае