Падзеі, факты, анонсы

Урачыстая цырымонія прайшла ў Нацыянальным акадэмічным тэатры імя Янкі Купалы ў Мінску. Упершыню медаль ЮНЕСКА атрымліваюць грамадзяне Беларусі. Раней, у 2014 годзе, медаля ЮНЕСКА "5 кантынентаў" быў удастоены Нацыянальны акадэмічны Вялікі тэатр оперы і балета Беларусі.

Як растлумачыў першы намеснік міністра замежных спраў Аляксандр Міхневіч, медалём "Віктор Гюго" дзеячаў культуры ўзнагароджваюць з 1985 года. "Рашэнне ЮНЕСКА аб узнагароджанні трох беларускіх дзеячаў культуры гэтай высокай узнагародай сведчыць аб прызнанні і значнай ролі ў захаванні і развіцці нашай нацыянальнай культуры. Гэта таксама сведчыць аб высокім месцы беларускай культуры сярод культур свету", - падкрэсліў ён.

У сваю чаргу Павел Латушка адзначыў: "Беларусь - краіна багатая на гісторыю і культуру. Як і ў кожнай краіне, гісторыя складаецца з фактаў і падзей, але іх робяць канкрэтныя людзі, выключныя, таленавітыя, крэатыўныя, надзвычайныя і не надзвычайныя. Для мяне сёння як для беларуса, як для грамадзяніна Беларусі, як для прадстаўніка Беларусі пры ЮНЕСКА вялікі гонар вітаць такіх выключных людзей. Тых людзей, якія фактычна сфарміравалі і сёння прадаўжаюць фарміраваць беларускую нацыянальную школу тэатральнага і музычнага мастацтва".

Пасля цырымоніі пачаўся перадпрэм'ерны паказ спектакля "ART" у пастаноўцы лаўрэата Дзяржаўнай прэміі Рэспублікі Беларусь Мікалая Пінігіна.

Ніжнікава Тамара Мікалаеўна, спявачка, педагог, народная артыстка Беларусі (1955), народная артыстка СССР (1964), нарадзілася 9 сакавіка 1925 года ў Самары. У 1949 годзе скончыла Маскоўскую кансерваторыю. У 1951-1976 гадах салістка Дзяржаўнага тэатра оперы і балета Беларусі, з 1964 адначасова выкладчык Беларускай акадэміі музыкі (з 1980-га - прафесар). Сярод партый: Марынка ("Марынка" Р. Пукста), Ірына ("Калючая ружа" Ю. Семянякі), Ганна ("Страшны двор" С. Манюшкі) і інш. У канцэртным рэпертуары спявачкі значнае месца займалі творы беларускіх кампазітараў, напісаныя спецыяльна для яе, а таксама беларускія народныя песні. Удзельнічала ў перадачах беларускага тэлебачання і радыё. Узнагароджана ордэнамі Айчыны III ступені, Францыска Скарыны, Працоўнага Чырвонага Сцяга, Дружбы народаў.

Аўсяннікаў Генадзь Сцяпанавіч, акцёр, народны артыст Беларусі (1974), народны артыст СССР (1991), нарадзіўся 19 лютага 1935 года ў Магілёве. У 1957 годзе скончыў Беларускі тэатральна-мастацкі інстытут. Працуе ў Нацыянальным акадэмічным тэатры імя Я.Купалы. Яго творчасці ўласцівы свабода самавыяўлення, імправізацыйнасць ігры, здольнасць выразна і арганічна перадаваць этнаграфічныя рысы персанажа, сакавіты народны гумар, дакладнасць псіхалагічнага і пластычнага малюнку ролі. Сярод роляў: Пустарэвіч ("Паўлінка" Я. Купалы), Ермалаеў ("Апошняе спатканне" А. Галіна), Цярэшка ("Трыбунал" А. Макаёнка). Здымаўся ў фільмах "Доўгія вёрсты вайны", "Апошняе лета дзяцінства", "Полымя", "Дунечка" і інш. Лаўрэат Дзяржаўнай прэміі Беларусі (1988), спецыяльнай прэміі Прэзідэнта Рэспублікі Беларусь (2008). Узнагароджаны ордэнам Францыска Скарыны.

Янкоўскі Расціслаў Іванавіч, народны артыст Беларусі (1967), народны артыст СССР (1978), нарадзіўся 5 лютага 1930 года ў Адэсе. У 1951 годзе скончыў студыю пры Ленінабадскім драматычным тэатры. З 1957 года артыст Нацыянальнага акадэмічнага драматычнага тэатра імя М. Горкага. Яго творчасць адметная псіхалагічнай глыбінёй, эмацыянальнай напоўненасцю, вострым драматызмам. Сярод роляў: Арбенін ("Маскарад" М. Лермантава), Ягор Булычоў ("Ягор Булычоў і іншыя" М. Горкага), Вяршынін ("Тры сястры" А. Чэхава) і інш. Зняўся ў фільмах: "Кафедра", "Любіць па-руску-3", "Тры жанчыны і мужчына" і інш. Лаўрэат Дзяржаўнай прэміі Беларусі (1998), прэміі "За духоўнае адраджэнне" (2003). Узнагароджаны ордэнамі Айчыны II і III ступені, ордэнам Францыска Скарыны, Працоўнага Чырвонага Сцяга, Дружбы народаў, "Знак Пашаны".