Еўрапейскія гульні-2019 у Мінску
Афіцыйны сайт Рэспублікі Беларусь
Свята Купалле
Прэс-цэнтр
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Прэс-цэнтр | Падзеі, факты, анонсы

Падзеі, факты, анонсы

20 Ліп 2018

У Глыбокім прэзентавалі фотаальбом выдавецтва БЕЛТА

20 ліпеня, Глыбокае /Андрэй Шчарбіцкі - БЕЛТА/. У Глыбокім прэзентавалі фотаальбом выдавецтва БЕЛТА, перадае карэспандэнт БЕЛТА.

У Год малой радзімы Беларускім тэлеграфным агенцтвам пры садзейнічанні Глыбоцкага райвыканкама падрыхтаваны і выдадзены альбом "Глыбокае з вышыні птушынага палёту". Кніга з дзясяткамі фатаграфій падзелена на тры тэматычныя блокі - "Любімы горад", "Проста жыццё" і "Па-за часам". У іх сабраны здымкі пра паўсядзённае жыццё жыхароў раёна з іх звычаямі, святамі, побытам, радасцямі і перажываннямі. Паказана дзейнасць мясцовых майстроў, музыкантаў, творчых калектываў. Асаблівая ўвага ўдзяляецца непаўторнаму хараству прыроды глыбоцкай зямлі. Альбом выйшаў у свет на трох мовах - беларускай, рускай і англійскай.

У гутарцы з карэспандэнтам БЕЛТА старшыня Глыбоцкага райвыканкама Алег Морхат падкрэсліў, што райцэнтр з кожным годам змяняецца, гэта адзначаюць і госці горада, таму важна занатаваць на памяць прыгажосць краю і тое, як ён развіваецца.

"Асаблівае хараство нашай зямлі адкрываецца, калі ты бачыш яе з вышыні птушынага палёту. Дзякуючы альбому такая магчымасць з'яўляецца ва ўсіх жадаючых. Радуе, што ў кнізе ўвага ўдзелена нашым простым і добразычлівым працаўнікам вёскі, людзям старэйшага пакалення, якія да нас працавалі на карысць краю. Альбом стане напамінам пра навакольнае хараство малой радзімы, якую трэба берагчы і прымнажаць", - сказаў Алег Морхат.

Выданне альбома "Глыбокае з вышыні птушынага палёту" не першы вынік супрацоўніцтва Глыбоцкага раёна і выдавецтва БЕЛТА - у 2014 годзе да 600-годдзя горада выйшлі ў свет кнігі "Глыбоччыны духоўнасці глыбіні" і "Глыбоччына. Ілюстраваны летапіс краю".

У Глыбокім гэтымі днямі шосты раз праходзіць "Вішнёвы фестываль". Увечары адбудзецца адкрыццё рэзідэнцыі Вішнёвай каралевы, галоўнай падзеяй суботняга дня стане ўрачыстае шэсце "У гасцях у Вішні". Запланаваны таксама агляд-конкурс падворкаў "Вішнёвы рай", урачыстая рэгістрацыя шлюбу "Вішнёвае вяселле", конкурс баяністаў, фінал конкурсу прыгажосці "Міс экстрым", гала-канцэрт і аўкцыён "Вішнёвы пірог".

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі
Партызанскі летапіс