Падзеі, факты, анонсы

ТЮГ у новым сезоне пакажа дэтэктыўную гісторыю, спектакль на беларускай мове і казку пра дамавіка

Фота з архiва

25 жніўня, Мінск /Кар. БЕЛТА/. У Беларускім дзяржаўным акадэмічным тэатры юнага гледача расказалі, чым будуць здзіўляць у пачатку 66-га тэатральнага сезона, паведаміла карэспандэнту БЕЛТА галоўны адміністратар ТЮГа Лідзія Лебедзева.

Новы сезон 17 верасня адкрыюць прэм'ерным спектаклем на беларускай мове "Сцяпан - вялікі пан". "Гэта пастаноўка сумяшчае ў сабе розныя формы тэатра - тэатр ценяў, лялек, ігра акцёраў. Сюжэт падобны да пастаноўкі "Ката ў ботах", толькі замест ката будзе ліса", - расказала адміністратар.

Для маленькіх гасцей тэатра 18 верасня пакажуць дзве казкі ў адной пастаноўцы - "Чырвоны Каптурок" і "Тры вясёлыя парсючкі". "Гэта не класічны "Чырвоны Каптурок", а стылізаваны. Мілая і прыемная гісторыя паводле матываў французскай, нямецкай і англійскай народных казак. Сама пастаноўка падзелена на дзве дзеі", - дадала Лідзія Лебедзева.

Гледачам падлеткавага ўзросту 24 верасня прапануюць наведаць спектакль "Міхалава зямля" паводле паэмы Якуба Коласа. "ТЮГ часта ўспрымаюць як тэатр толькі для дзяцей, і нам часта даводзіцца тлумачыць, што ў нас ёсць выдатныя пастаноўкі і для дарослых, - адзначыла Лідзія Лебедзева. - Так, 29 верасня пакажуць "Шамацілу" - казку пра дамавіка, які задае шмат пытанняў, спрабуючы прабудзіць людзей да жыцця, паказваючы розныя бакі чалавечага характару: сумленнасць, адданасць і любоў. У рэпертуары на верасень ёсць яшчэ адзін спектакль, які паспяхова адпрацаваў мінулы сезон, - дэтэктыўная гісторыя "Восем закаханых жанчын", якую пакажуць 30 верасня. Гэта стыльная і эфектная пастаноўка ў стылі танга, якая трымае лінію інтрыгі да канца".

Акрамя таго, прадставяць ужо любімыя і вядомыя гледачу пастаноўкі "Кот у ботах" 25 верасня (11.00), "Дзюймовачка" 19 верасня (11.00) і інтэрактыўны спектакль "Доктар Айбаліт" 26 верасня (11.00).

"Тэатр выхоўвае паводзіны, таму дзецям так важна наведваць яго. Галоўная задача, якую ставяць перад сабой тыя, хто мае дачыненне да пастановак, - каб глядач не проста атрымліваў задавальненне, але і ўсведамляў глыбокую думку. Гэта храм мастацтва, у які хочацца прыходзіць, галоўнае, каб сэрца не заставалася абыякавым".

Цяпер у распрацоўцы знаходзяцца яшчэ два дзіцячыя спектаклі.

версія для друку

зрабіць стартавай

дабавіць у выбранае