Падзеі, факты, анонсы

Сукенкі з крыналінам для дам і парадны выгляд кавалераў. Агульнагарадскі баль пройдзе ў Гомелі 12 жніўня

Фота з архiва

11 жніўня, Гомель /Кар. БЕЛТА/. Другі агульнагарадскі баль гамяльчан, прымеркаваны да Дня горада Гомеля, адбудзецца 12 жніўня, паведамляе БЕЛТА са спасылкай на арганізатараў.

Баль гамяльчан збярэ прыхільнікаў лепшых традыцый на набярэжнай Сожа ў парку каля Лебядзінай сажалкі. У бягучым годзе Гомель адзначыць 881-годдзе з першага згадвання ў летапісных дакументах, і гэтай даце прысвечана мерапрыемства.

Пачне дзейства маляўнічае касцюміраванае шэсце ад Гарадскога цэнтра культуры да набярэжнай ракі Сож.

Сам баль уключае два аддзяленні танцавальнай праграмы. У бальнай карце - вальс знаёмстваў, падэграс, полька-тройка, гранд-марш, падэспань, рускі вальс, свецкі ручаёк і інш. Каб пары маглі адпачыць, а гледачы - атрымаць асалоду ад эстэтыкі вечара, прадугледжаны таксама творчыя нумары і паказальныя выступленні танцавальных клубаў і аб'яднанняў.

Дрэс-код - абавязковая ўмова для ўдзельнікаў. Для дам гэта бальныя сукенкі з крыналінам або без, веер і пальчаткі. Кавалеры павінны апрануцца ў белую кашулю і чорныя штаны, дапоўніўшы вобраз гальштукам-бабачкай, чорнымі туфлямі і пальчаткамі.

Арганізуе баль Гомельскі гарадскі цэнтр культуры. Плануецца ўдзел клубаў гісторыка-бытавога, бальнага танца Гомеля і іншых гарадоў Беларусі.

Пачатак у 16.00. Запрошаны ўсе жадаючыя. Атмасфернасць, эстэтычнае задавальненне і яркія станоўчыя эмоцыі гарантаваны.

версія для друку

зрабіць стартавай

дабавіць у выбранае