Падзеі, факты, анонсы
"Смілавічы - Чэрвень: ад мінулага да сучаснага". Новы маршрут па Беларусі прэзентуюць прадстаўнікам турбізнесу
18 лістапада, Чэрвеньскі раён /Кар. БЕЛТА/. Выязны семінар Нацыянальнага агенцтва па турызме з прэзентацый маршруту "Смілавічы - Чэрвень: ад мінулага да сучаснага" стартаваў у Мінскай вобласці, перадае карэспандэнт БЕЛТА.
У праграме - аглядная пешаходная экскурсія па Чэрвені, наведванне Чэрвеньскага раённага краязнаўчага музея, помніка, устаноўленага на месцы расстрэлу 2000 мірных жыхароў яўрэйскай нацыянальнасці, экспазіцыі "Ведаць, каб памятаць - памятаць, каб жыць" у сярэдняй школе нумар 1 Смілавіч.
Таксама ўдзельнікі семінара пабываюць у музеях "Гісторыя мануфактуры Беларусі" (у сярэдняй школе нумар 2 Смілавіч), "Прастора Хаіма Суціна", Лядзенскім Свята-Благавешчанскім мужчынскім манастыры, капліцы на Святой (Мар'інай) горцы. Адбудзецца круглы стол, прысвечаны перспектывам развіцця турыстычнага патэнцыялу Чэрвеньскага раёна.
Семінар накіраваны на пашырэнне рэгіянальнага турыстычнага прадукту. У ліку ўдзельнікаў - прадстаўнікі турыстычных арганізацый, супрацоўнікі Дэпартамента па турызме Міністэрства спорту і турызму, Нацыянальнага агенцтва па турызме, экскурсаводы, СМІ, гіды-перакладчыкі, выкладчыкі турыстычных дысцыплін.
Нацыянальнае агенцтва па турызме праводзіла ўжо выязны семінар у рэгіёне два гады таму. Як расказала намеснік дырэктара Нацыянальнага агенцтва па турызме Ганна Вашчынчук, Чэрвеньскі раён перш за ўсё цікавы як радзіма сусветна вядомага мастака Хаіма Суціна. Таксама тут развіваецца адукацыйны, рэлігійны турызм. Летам магчымы экскурсіі на фермерскія гаспадаркі, дзе вырошчваюць буякі, у аграсядзібы.
"Смілавічы і Чэрвень знаходзяцца блізка да сталіцы. З адкрыццём экспазіцыі "Прастора Хаіма Суціна" сюды сталі прыязджаць турысты, але патэнцыял значна большы. Сёння прэзентуем маршрут, па якім напісаны кантрольны тэкст экскурсіі і можна прайсці атэстацыю. Ёсць шмат мясцін, дзе варта пабываць. На семінары абмяркуем, што трэба зрабіць, каб гэтыя месцы сталі больш папулярнымі ў турыстаў", - адзначыла Ганна Вашчынчук.
версія для друку
зрабіць стартавай
дабавіць у выбранае