Падзеі, факты, анонсы

Шкатулка каштоўнасцей: больш за 250 упрыгажэнняў народаў Еўразіі прадставяць у Мінску

Фота з архiва

4 лістапада, Мінск /Кар. БЕЛТА/. Расійскі этнаграфічны музей прадставіць 4 лістапада ў Нацыянальным мастацкім музеі выстаўку "Шкатулка каштоўнасцей", прысвечаную традыцыйным упрыгажэнням народаў Еўразіі XVII - ХХ стагоддзяў, паведамілі БЕЛТА арганізатары.

Жыхары і госці Мінска ўбачаць больш за 250 шэдэўраў, якія характарызуюць ювелірную традыцыю і эстэтычныя густы амаль 40 народаў Расійскай імперыі. Збор Расійскага этнаграфічнага музея налічвае каля 13 тыс. прадметаў, якія належаць да культуры народаў Беларусі. На выстаўцы госці ўбачаць унікальны помнік беларускай культуры - слуцкія паясы, а таксама прадметы, якія прадстаўляюць славянскія народы еўрапейскай часткі Расіі, Прыбалтыкі, Паволжа, Каўказа, Казахстана і Сярэдняй Азіі, Сібіры і Далёкага Усходу.

Выстаўка прадстаўляе разнастайнасць нацыянальных культур на прыкладзе ювелірнага майстэрства. Яна стане важным этапам развіцця гуманітарнага супрацоўніцтва, якое нядаўна абмяркоўвалі спецыялісты абедзвюх краін у час Дзён духоўнай культуры Расійскай Федэрацыі ў Рэспубліцы Беларусь, якія прайшлі 13-14 кастрычніка ў Мінску. "Выстаўка Расійскага этнаграфічнага музея - гэта перш за ўсё магчымасць развіваць нашы культурныя сувязі з Рэспублікай Беларусь, абмеркаваць такія важныя пытанні, як захаванне і папулярызацыя агульнай культурна-гістарычнай і духоўнай спадчыны нашых краін. "Шкатулка каштоўнасцей" сабрана з асаблівым пачуццём павагі да непарыўнай сувязі нашых народаў, у аснове якой ляжаць духоўная блізкасць, агульнасць мовы і багатыя культурныя традыцыі", - падкрэсліла дырэктар Расійскага этнаграфічнага музея Юлія Купіна.

Паводле яе слоў, сумесны праект музеяў Расіі і Беларусі паказвае беражлівае стаўленне да духоўна-маральных каштоўнасцей і культурнай спадчыны, сапраўдныя прынцыпы дружбы і супрацоўніцтва ў імя стварэння. "Выстаўка Расійскага этнаграфічнага музея ў Нацыянальным мастацкім музеі Рэспублікі Беларусь яшчэ раз пацвярджае, што нашы музеі разумеюць вялікую цывілізацыйную адказнасць нашых народаў у пазнанні і захаванні культурных традыцый і мастацтва", - дадала Юлія Купіна.

Упрыгажэнні - абавязковая частка традыцыйнага касцюмнага комплексу, якая мае не толькі эстэтычнае значэнне, але і надзелена абрадавымі і магічнымі функцыямі. Упрыгажэнні былі знакамі полу і ўзросту, адлюстроўвалі сямейнае і грамадскае становішча, былі сімваламі ўлады і сведчаннем матэрыяльнага дабрабыту, служылі абярэгам, паказвалі на канфесійную і этнічную прыналежнасць. Знакавасць, характэрная для народнага мастацтва ў цэлым, дасягала ва ўпрыгажэннях максімальнай канцэнтрацыі. У іх было важна ўсё: матэрыял, колькасць, форма, дэкор.

Рускія ўпрыгажэнні, напоўненыя тонкай гармоніяй каларыту, мяккасцю і пявучасцю ліній, сібірскія вырабы з іх падкрэсленай манументальнасцю, сярэднеазіяцкія ўпрыгажэнні, якія валодаюць яркай поліхраміяй і пластычнасцю, вытанчаная графіка каўказскіх майстроў і філігранная работа паволжскіх ювеліраў, сабраныя разам, ствараюць фонд ювелірнага мастацтва народаў Расіі і фарміруюць вобраз шкатулкі каштоўнасцей у скарбніцы традыцыйнай культуры.

Выстаўка "Шкатулка каштоўнасцей" прадоўжыцца да 11 снежня.

версія для друку

зрабіць стартавай

дабавіць у выбранае