Падзеі, факты, анонсы

Шасціметровы "Трыумфальны слон" Сальвадора Далі размесціцца ў цэнтры Мінска

Фрагмент карціны Сальвадора Далі "Сланы"

7 сакавіка, Мінск /Кар. БЕЛТА/. Бронзавая скульптура Сальвадора Далі "Трыумфальны слон" вышынёй амаль 6 м і вагой больш за 2,5 т размесціцца ў цэнтры Мінска, на перасячэнні вуліц Зыбіцкай і Герцэна. Афіцыйнае адкрыццё адбудзецца 14 сакавіка, паведамілі БЕЛТА ў Нацыянальным мастацкім музеі Беларусі.

Скульптура "Трыумфальны слон" была задумана ў 1975 годзе, упершыню выканана ў 1984-м. Слон з ненатуральна доўгімі і тонкімі нагамі ўпершыню з'яўляецца ў творчасці Далі ў карціне "Спакушэнне святога Антонія" ў 1946 годзе і становіцца адным з любімых і тыражуемых вобразаў мастака. Раней скульптура выстаўлялася ў Шанхаі, Бахрэйне, Дубаі, Хайфе і Льежы.

"Трыумфальны слон" - адзін з экспанатаў міжнароднага выставачнага праекта "Сальвадор Далі", які прадставяць у Нацыянальным мастацкім музеі 16 сакавіка. Экспазіцыя ўключае больш за 100 твораў скульптуры, графікі і ювелірных вырабаў з золата, серабра і каштоўных камянёў, а таксама прадметы дэкаратыўна-прыкладнога мастацтва, створаныя адным з найвялікшых мастакоў ХХ стагоддзя. Экспанаты з'яўляюцца часткай калекцыі "Сусвет Далі" (Dali Universe), творы якой былі прадстаўлены больш як у 100 прэстыжных музеях па ўсім свеце. Выстаўкі наведалі каля 12 млн чалавек. Такая незвычайная калекцыя раскрывае малавядомы аспект работы Далі, прадастаўляючы скульптуры выконваць галоўную ролю.

Сальвадор Далі - самы вядомы мастак сюррэалізму, які адлюстраваўся ва ўсіх сферах яго творчасці - жывапісе, скульптуры, дызайне, графіцы, кіно, модзе. "Далі прымяняў сюррэалістычную канцэпцыю да ўсяго, што ён гаварыў і рабіў. Смеласць і мяцежнае стаўленне да мастацтва аддалілі яго ад іншых і далі магчымасць стварыць некаторыя з самых вядомых твораў ХХ стагоддзя. Нават праз 30 гадоў пасля смерці майстра ўплыў яго мастацтва можна ўбачыць амаль усюды ў свеце. Імя Далі чароўнае, яно застаецца культавым для сучаснага мастацтва", - адзначыла загадчыца сектара міжнародных выставак выставачнага аддзела музея, куратар праекта Вольга Клецкіна.

Выстаўка "Сальвадор Далі" ў Нацыянальным мастацкім музеі прадоўжыцца па 30 чэрвеня.

версія для друку

зрабіць стартавай

дабавіць у выбранае