Падзеі, факты, анонсы
"Саня, Ваня, з імі Рымас". Драмтэатр Якуба Коласа ў Віцебску падрыхтаваў прэм'еру
Фота з архiва
25 кастрычніка, Віцебск /Кар. БЕЛТА/. Віцебскі Нацыянальны акадэмічны драматычны тэатр імя Якуба Коласа падрыхтаваў прэм'еру спектакля "Саня, Ваня, з імі Рымас", перадае карэспандэнт БЕЛТА.
Меладраму "Саня, Ваня, з імі Рымас" у дзвюх дзеях у пастаноўцы Вячаслава Грушова падрыхтавалі да прагляду на камернай сцэне. Матэрыял уваходзіць у трылогію "вясковых апавяданняў" нараўне з "Байкальскай кадрыляй" і п'есай "Каханне і галубы". Усе гэтыя творы, як і сцэнарый да аднайменнага фільма па апошнім з іх, напісаў расійскі драматург Уладзімір Гуркін.
Гісторыя аб тым, як разам і ў разлуцы блізкія перажываюць цяжар і нягоды ваеннага ліхалецця і пасляваенны перыяд, пра высокія чалавечыя адносіны, пра адданых і родных адзін аднаму людзей.
Паводле слоў рэжысёра-пастаноўшчыка Вячаслава Грушова, ён даўно быў знаёмы з гэтай п'есай і хацеў узяць яе ў рэпертуар, аднак абставіны не дазвалялі. "Цяпер настаў момант, - тлумачыць ён. - П'еса цікавая і глыбокая, апошняя п'еса драматурга. Людзей жа таго пакалення, якое жыло ў ваенныя гады і было на фронце, практычна ўжо няма ў жывых. У час вайны мужчын практычна не стала, але ў тыле засталіся іх жонкі, сёстры, пляменнікі. І на іх плечы легла вялікая-вялікая работа, а яны захавалі ў сабе
чалавечнасць, годнасць, самаахвярнасць. Людзі выстаялі, выжылі і далі жыццё нашаму пакаленню. Спектакль прысвячаецца бабулям, дзядулям, бацькам майго пакалення, якіх ужо няма на свеце. Нагадаць пра іх, якімі яны былі маладымі, жывымі, маглі і ўмелі любіць - вось пра гэта спектакль".
У спектаклі задзейнічаны два склады акцёраў. Роля Рымаса ў адным з іх выконвае вядучы майстар сцэны Пётр Ламан, які таксама пераклаў п'есу для пастаноўкі. "Гэты чалавек, які любіць і разумее, што шчасце наўрад ці будзе, інтуітыўна адчувае, што яго любоў так і застанецца без адказу. У п'есе вельмі цікавыя драматычныя моманты: муж знік і не проста не прыйшоў у час вайны і не пісаў, а яго не было і чатыры гады пасля. У героя з'яўляецца надзея, што вось-вось ён будзе шчаслівы", - апісвае гісторыю свайго героя Пётр Ламан.
Акцёр дадае, што аўтар праўдзіва перадае ўсе характары персанажаў, а многія характарыстыкі ўзяты з жыцця. "П'еса ўражвае праўдай характару, сітуацыі, адчування гэтай вайны. Я яшчэ застаў людзей, якія ваявалі. Бацька ўсю блакаду знаходзіўся ў Ленінградзе, пры прарыве блакады быў цяжка паранены. Дзед быў партызанам, таму я шмат ведаю ад жывых людзей, што такое вайна, - сказаў Пётр Ламан. - Аўтар якраз змог стварыць гэту атмасферу, а рэжысёр яе вельмі добра прачытаў, падабраў адпаведных артыстаў і стварыў вельмі жывы і цёплы спектакль, які эмацыянальна ўздзейнічае на гледача".
Прасякнуцца жыццёвай гісторыяй ваеннага і пасляваеннага часу ў Нацыянальным акадэмічным драматычным тэатры імя Якуба Коласа віцебскі глядач зможа 27 і 29 кастрычніка.
версія для друку
зрабіць стартавай
дабавіць у выбранае