Падзеі, факты, анонсы
Румо расказаў аб навацыях законапраекта аб донарстве крыві і яе кампанентаў
Фота з архiва
27 верасня, Мінск /Кар. БЕЛТА/. Кроў з'яўляецца стратэгічным для краіны прадуктам, заявіў журналістам член Пастаяннай камісіі Савета Рэспублікі па міжнародных справах і нацыянальнай бяспецы Алег Румо, каменціруючы законапраект "Аб змяненні законаў па пытаннях аховы здароўя, донарства крыві і яе кампанентаў", - перадае карэспандэнт БЕЛТА.
"Кроў - стратэгічны для краіны прадукт. Зразумела, што без урэгулявання пытанняў, звязаных з донарствам крыві, немагчыма дынамічнае развіццё як аховы здароўя, так і ўсёй краіны ў цэлым. Таму Беларусь, як і ўсе цывілізаваныя краіны, рухаецца ў адным напрамку. Першы напрамак - гэта павелічэнне запасаў, паколькі яны патрэбны не толькі для захоўвання, але і для выпрацоўкі розных заменнікаў крыві. Другі - забеспячэнне бяспекі донараў. Трэці - рух у бок валанцёрства. Новая рэдакцыя закона аб донарстве крыві і яе кампанентаў накіравана менавіта на прывядзенне ўсіх напрамкаў да рэалій сённяшняга дня", - расказаў Алег Румо.
Донар крыві і яе кампанентаў можа сам выбраць, атрымліваць кампенсацыю за здачу крыві ці не атрымліваць, удакладніў сенатар. "Наступны момант адносна персанальных даных, апрацоўкі інфармацыі, бяспекі. Таму што мы павінны быць упэўнены, што гэты працэс празрысты і абсалютна бяспечны. А таксама правядзенне даволі сур'ёзнай інфармацыйнай кампаніі ў грамадстве, накіраванай на прапаганду валанцёрства, на прапаганду бязвыплатнага донарства. Па гэтых усіх напрамках абавязкова будзем рухацца паралельна і задача адна - павялічыць гэты стратэгічны запас для краіны, зрабіць бяспечным для нашых людзей і атрымаць, назавём гэта, сацыяльны адказ. Таму што кожны будзе ўключаны ў аказанне дапамогі людзям, і гэта вельмі важная сацыяльная задача", - дадаў ён.
Сенатары на дзясятай сесіі Савета Рэспублікі Нацыянальнага сходу сёмага склікання адобрылі законапраект "Аб змяненні законаў па пытаннях аховы здароўя, донарства крыві і яе кампанентаў". Праект закона накіраваны на комплекснае змяненне падыходаў да рэгулявання грамадскіх адносін у галіне донарства крыві і яе кампанентаў. У ліку асноўных новаўвядзенняў прапануецца замацаванне права донара на пакрыццё, а таксама адмова ад пакрыцця расходаў, звязаных з выкананнем ім донарскай функцыі, устанаўленне адзіных гарантый і кампенсацый, якія прадастаўляюцца донару незалежна ад выкарыстання ім права на пакрыццё затрат, звязаных з донарскай функцыяй.
Вызначаны сучасныя рэсурсаёмістыя тэхналогіі павышэння бяспекі крыві, яе кампанентаў для жыцця і здароўя пацыентаў, а таксама сістэмы кантролю якасці крыві, яе кампанентаў і сістэмы гемабяспекі. Павялічваецца ўзрост донараў з 60 да 65 гадоў. Захоўваецца выключнае права дзяржавы на нарыхтоўку і (або) рэалізацыю крыві, яе кампанентаў, дэталізуецца пералік мерапрыемстваў па прапагандзе і развіцці донарства, рэгламентуюцца пытанні прыцягнення валанцёраў для арганізацыі гэтых мерапрыемстваў па садзейнічанні донарству.
версія для друку
зрабіць стартавай
дабавіць у выбранае