Падзеі, факты, анонсы

Рэспубліканскі тэатр беларускай драматургіі ўпершыню пакажа свае спектаклі ў Кітаі

11 лістапада, Мінск /Кар. БЕЛТА/. Рэспубліканскі тэатр беларускай драматургіі ўпершыню пакажа свае спектаклі ў Кітайскай Народнай Рэспубліцы з 25 лістапада па 7 снежня. Аб гэтым расказалі БЕЛТА ў тэатры.

Шанхайскі глядач зможа ўбачыць дзве нядаўнія прэм'еры Рэспубліканскага тэатра беларускай драматургіі і Цэнтра беларускай драматургіі - аўтарскі "Май хомлэнд" і знакаміты "Вечар" паводле аднайменнай п'есы Аляксея Дударава. Калектыў выступіць у Маладым тэатры ("Theatre Young"). Гэта адзін з важнейшых культурных цэнтраў Шанхая, які займаецца сучасным мастацтвам і кожны год прымае тэатральныя калектывы з усяго свету. Спектаклі пакажуць на беларускай мове з кітайскімі і англійскімі субцітрамі.

Паказы спектакляў пройдуць у рамках Асенняга фестывалю і Шанхайскага міжнароднага фестывалю мастацтваў. Для абедзвюх краін гэта не проста паказы, а мастацкі мост паміж беларускай і кітайскай культурамі, магчымасць паказаць сэрца Беларусі праз спектаклі, а таксама сустрэць новых сяброў, якія размаўляюць на розных мовах, але разумеюць адзін аднаго праз мастацтва.

Спектаклі РТБД адабраны для ўдзелу ў прэстыжным міжнародным фестывалі як прыклад сучаснай беларускай тэатральнай культуры, якая можа гаварыць з гледачамі на ўніверсальнай мове сімвалаў, метафар і архетыпаў.

"Я заўсёды ведала, што ў беларускага тэатра багатыя традыцыі. У выбраных для паказу спектаклях я ўбачыла тое, што можа быць цікава нашаму гледачу. Так, мы гаворым на розных мовах, у нашых краін розны вопыт і спадчына. Але менавіта культурны абмен умацоўвае ўзаемаразуменне. Спадзяюся, прыезд тэатра стане пачаткам нашага доўгатэрміновага супрацоўніцтва з Беларуссю", - адзначыла праграмны дырэктар Маладога тэатра  Хань Баа.

У час фестывалю таксама пройдуць творчыя сустрэчы, майстар-класы і лекцыі з прадстаўнікамі калектыву тэатра.

версія для друку

зрабіць стартавай

дабавіць у выбранае