Падзеі, факты, анонсы

Рэканструкцыя сярэдневяковага бою і майстар-класы. У Белавежскай пушчы арганізуюць дзень жывой археалогіі

Фота з архiва

14 жніўня, Брэст /Кар. БЕЛТА/. У нацыянальным парку "Белавежская пушча" 19 жніўня арганізуюць дзень жывой археалогіі, паведамляе карэспандэнт БЕЛТА.

Гасцям прапануюць акунуцца ў гістарычную атмасферу, правёўшы дзень на тэрыторыі Археалагічнага музея пад адкрытым небам. Наведвальнікам пакажуць побыт народаў, якія ў мінулым жылі ў Белавежскай пушчы. Запланаваны экскурсія з гістарычным інтэрактывам, рэканструкцыя бою ранняга Сярэдневякоўя, можна будзе паспрабаваць сябе ў стральбе з лука. Будуць праведзены майстар-класы па старажытных рамёствах і промыслах.

Забаўляць публіку будуць творчыя калектывы. Гасцям прапануюць пачаставацца наварыстай юшкай і іншымі пушчанскімі прысмакамі.

Археалагічны музей пад адкрытым небам у Белавежскай пушчы - адзіны такі ў Беларусі. Ён адлюстроўвае жыццё нашых продкаў ад каменнага веку да ранняга Сярэдневякоўя. У экспазіцыях прадстаўлены жыллё, прадметы побыту, прылады працы і віды дзейнасці старажытнага чалавека. На тэрыторыі музея размешчаны першабытныя стаянкі эпохі ранняга каменнага веку, паселішча бронзавага веку, гарадзішча позняга бронзавага - ранняга жалезнага веку, старажытнагерманскі падворак жалезнага веку, славянскае паселішча ранняга Сярэдневякоўя.

версія для друку

зрабіць стартавай

дабавіць у выбранае