Падзеі, факты, анонсы
Прысвечаная жыццю і творчасці Васіля Быкава выстаўка адкрылася ў МЗС Беларусі
20 чэрвеня, Мінск /Кар. БЕЛТА/. Выстаўка "Васіль Быкаў. Доўгая дарога дадому...", прысвечаная жыццю і творчасці беларускага пісьменніка і Дню ўсенароднай памяці ахвяр Вялікай Айчыннай вайны, адкрылася сёння ў Міністэрстве замежных спраў. Аб гэтым БЕЛТА паведамілі ў прэс-службе знешнепалітычнага ведамства.
Выстаўка заснавана на апошняй прыжыццёвай кнізе пісьменніка і ўяўляе сабой літаратурна-дакументальны праект Дзяржаўнага музея гісторыі беларускай літаратуры.
Намеснік міністра замежных спраў Алена Купчына, адкрываючы экспазіцыю, адзначыла, што імя Васіля Быкава вядома не толькі ў Беларусі, але і далёка за яе межамі. Яго творы, прысвечаныя Вялікай Айчыннай вайне, займаюць асаблівае месца ў беларускай і замежнай літаратуры, перакладзены на 52 мовы свету.
У сваю чаргу дырэктар Дзяржаўнага музея гісторыі беларускай літаратуры Лідзія Макарэвіч расказала, што першая (яшчэ прыжыццёвая) выстаўка, прысвечаная Васілю Быкаву, мела назву - "Голас Быкава чуе ўвесь свет". "Сімвалічна, што менавіта яна паслужыла асновай для цяперашняй экспазіцыі, гасцямі якой сталі шматлікія прадстаўнікі розных краін свету", - дадала яна. Паводле слоў Лідзіі Макарэвіч, асаблівую каштоўнасць сярод экспанатаў уяўляюць матэрыялы, перададзеныя ў музей асабіста пісьменнікам і яго жонкай, а таксама шматлікія фатаграфіі мясцін у Беларусі і за мяжой, з якімі звязаны жыццёвы шлях вядомага пісьменніка.
У цырымоніі адкрыцця выстаўкі прынялі ўдзел міністр замежных спраў Уладзімір Макей, кіраўнікі дыпламатычнага корпуса, акрэдытаванага ў Беларусі, і іншыя госці.
версія для друку
зрабіць стартавай
дабавіць у выбранае