11 кастрычніка, Мінск /Кар. БЕЛТА/. Член брытанскай каралеўскай сям'і прынц Майкл Кенцкі азнаёміўся з экспазіцыяй Беларускага дзяржаўнага музея гісторыі Вялікай Айчыннай вайны, перадае карэспандэнт БЕЛТА.
Высокі госць з вялікай цікавасцю азнаёміўся з работай музея, які з'яўляецца буйнейшым у Беларусі сховішчам рэліквій Вялікай Айчыннай вайны і адным з важнейшых цэнтраў грамадзянска-патрыятычнага выхавання. Член брытанскай сям'і цікавіўся гісторыяй стварэння музея, колькасцю гасцей. Яго цікавіла, як шмат школьнікаў наведваюць гэты музей. У час экскурсіі высокі госць задаваў многа пытанняў.
Майкл Кенцкі высока ацаніў экспазіцыю, работу музея па захаванні памяці аб подзвігу савецкага народа ў барацьбе з фашызмам. Яго Высокасць пакінуў запіс у Кнізе ганаровых гасцей.
Прынц Майкл Кенцкі наведвае Беларусь з рабочым візітам 10-13 кастрычніка. У ходзе візіту плануецца правядзенне сустрэч з афіцыйнымі асобамі, наведванне ПВТ, гістарычных і культурных аб'ектаў, у ліку якіх мемарыяльны комплекс "Хатынь", Нацыянальны мастацкі музей.