Падзеі, факты, анонсы
Праект ПалесДУ па кліматычным менеджменце стаў адным з пераможцаў конкурсу праграмы ЕС Erasmus+
Фота з архiва
17 жніўня, Брэст /Кар. БЕЛТА/. Палескі дзяржаўны ўніверсітэт стаў удзельнікам міжнароднага праекта па кліматычным менеджменце, паведаміў карэспандэнту БЕЛТА дэкан інжынернага факультэта ВНУ Уладзімір Штэпа.
Праект "Сінэргія адукацыйных, навуковых, кіраўніцкіх і прамысловых кампанентаў для кіравання кліматам і прадухілення змянення клімату" стаў адным з пераможцаў конкурсу праграмы Еўрапейскага саюза Erasmus+. У праекце ўдзельнічаюць 12 універсітэтаў з Італіі, Германіі, Украіны, Грузіі, Літвы, Латвіі, Беларусі. Акрамя пінскай ВНУ Беларусь таксама прадстаўляе Гродзенскі дзяржаўны ўніверсітэт імя Я. Купалы.
Каардынатарам ініцыятывы выступае нідэрландская акадэмія бізнесу. Праект стартуе ў лістападзе, сродкі на яго рэалізацыю выдзяляе Еўрапейская камісія. Па праекце на базе ўніверсітэта і тэхнапарка "Палессе" будзе заснаваны кансультацыйны цэнтр па кліматычным менеджменце і забеспячэнні яго ўстойлівага развіцця. Плануюцца візіты выкладчыкаў ПалесДУ ў еўрапейскія ўніверсітэты-партнёры. Шэраг статусных мерапрыемстваў (міжнародныя і рэгіянальныя канферэнцыі і семінары) пройдзе і ў Пінску. Таксама разглядаецца магчымасць арганізацыі міжнароднай летняй школы для маладых вучоных і экспертаў па кліматычным менеджменце.
"Ва ўніверсітэце ўжо ёсць сур'ёзныя навукова-тэхналагічныя распрацоўкі (асабліва ў галінах цыркулярнай эканомікі, рэцыклінга прыродных рэсурсаў і сістэм маніторынгу іх выкарыстання камунальна-прамысловымі аб'ектамі), якія могуць быць карысныя і цікавыя замежным калегам. Акрамя таго, навучальны працэс ва ўніверсітэце ўзмоцняць новыя лекцыйныя і лабараторна-практычныя заняткі, якія ўключаюць сучасны матэрыял па экалогіі. Напрыклад, студэнты ў сваіх дыпломных работах будуць ствараць праекты ўрбанізаваных тэрыторый з улікам патрабаванняў кліматычнага менеджменту", - адзначыў дэкан.
Паводле яго слоў, практычная каштоўнасць праекта ў тым, што атрыманыя вынікі можна будзе выкарыстоўваць пры распрацоўцы рэкамендацый для прамысловага сектара і мясцовых органаў улады. Гэта дасць магчымасць абгрунтаваць развіццё экалагічнага кіравання народнай гаспадаркай у краіне, якая адпавядала б лепшым сусветным аналагам.
версія для друку
зрабіць стартавай
дабавіць у выбранае