30 студзеня, Мінск /Кар. БЕЛТА/. У верасні ў Беларусі стартуе праект па аднаўленні тарфянікаў на
$4,3 млн, паведаміў сёння журналістам начальнік упраўлення біялагічнай і ландшафтнай разнастайнасці Мінпрыроды Мікалай Свідзінскі, перадае карэспандэнт БЕЛТА."У верасні павінен стартаваць праект па кіраванні ляснымі і балотнымі экасістэмамі на суму $4,3 млн. Грошы будуць накіраваны на рэабілітацыю балот", - адзначыў Мікалай Свідзінскі. Ён растлумачыў, што сродкі пойдуць на распрацоўку канцэпцыі праекта, а таксама непасрэдна на выкананне работ, звязаных з аднаўленнем гідралагічнага рэжыму, з аблясеннем гэтых тэрыторый. Цяпер ідзе працэс нацыянальнай рэгістрацыі праекта.
Начальнік упраўлення біялагічнай і ландшафтнай разнастайнасці расказаў, што
$4,3 млн - гэта сродкі ГЭФ. "Гэта ўклад міжнароднай тэхнічнай дапамогі ў захаванне нашых экасістэм, у прыватнасці, балот. Балоты - гэта ўнікальная каштоўнасць для ўсяго кантынента", - падкрэсліў ён.Спецыяліст расказаў, што ў 2016 годзе ўжо быў праведзены шэраг мерапрыемстваў праекта "Тарфянікі-2" па рэабілітацыі балот. Праект павінен быць завершаны ў 2017 годзе. Так, ужо выкананы комплекс работ па стварэнні травастояў на плошчы 494 га ў Бярозаўскім раёне Брэсцкай вобласці. У Лідскім лясгасе выкананы цыкл работ па пасадцы насаджэнняў чорнай вольхі на парушаных тарфяніках на плошчы 213 га. Завершаны работы па паўторным забалочванні парушаных тарфянікаў - было забалочана 14,45 га. Агульная плошча выпрацаваных тарфянікаў, што падпадаюць пад забалочванне, складае больш за 140 тыс. га, ацэначны кошт паўторнага забалочвання складзе каля $10 млн.
Акрамя таго, Мікалай Свідзінскі нагадаў, што ў 2016 годзе ў Беларусі была зацверджана стратэгія захавання і рацыянальнага выкарыстання тарфянікаў. Яна вызначае асноўныя праблемы ў гэтай галіне, сучасны стан тарфянікаў, а таксама чаканыя вынікі ад рэалізацыі дакумента. Так, да 2030 года ў Беларусі плануецца забяспечыць захаванне ў натуральным стане 684 тыс. га балот, вывучэнне 179 тыс. га балот і вызначэнне мер па забеспячэнні іх захавання. Зыходзячы з дакумента, павінна быць забяспечана аднаўленне не менш як 15 працэнтаў плошчы (не менш як 75 тыс. га) парушаных тарфянікаў, захаванне ў балотах каля 500 млн т вугляроду і звыш 7 млрд куб.м запасаў прэснай вады. Увага ўдзелена і захаванню месц пражывання дзікіх жывёл і месц росту дзікарослых раслін, уключаных у Чырвоную кнігу Беларусі. Таксама плануецца забяспечыць узнаўленне журавін ў аб'ёме каля 10,7 тыс. т штогод.
Пастановай зацверджана і схема размеркавання тарфянікаў па напрамках выкарыстання на перыяд да 2030 года. Дзяржорганы і арганізацыі абавязаны ўлічваць палажэнні стратэгіі і схемы размеркавання тарфянікаў пры падрыхтоўцы праектаў дзяржпраграм.
На гэты час у натуральным або блізкім да натуральнага стане захавалася 863 тыс. га балот (у тым ліку 684 тыс. га вывучаных балот, уключаных у схему размеркавання тарфянікаў па напрамках выкарыстання на перыяд да 2030 года).