Падзеі, факты, анонсы

Пякарскі заваяваў бронзу чэмпіянату Еўропы на дыстанцыі 50 м батэрфляем

Рыгор Пякарскі. Скрыншот відэа прамой трансляцыі

12 жніўня, Мінск /Кар. БЕЛТА/. Беларускі плывец Рыгор Пякарскі заваяваў бронзу чэмпіянату Еўропы па водных відах спорту, які праходзіць у Парыжы, паведамляе карэспандэнт БЕЛТА.

Наш спартсмен стаў прызёрам на дыстанцыі 50 метраў батэрфляем. У фінале Пякарскі паказаў рэзультат 22,68 сек і заняў трэцяе месца. У барацьбе за бронзу беларус на чатыры сотыя секунды апярэдзіў чэмпіёна свету і Алімпійскіх гульняў італьянца Томаса Чэкана. Золата з часам 22,52 сек выйграў расіянін Ягор Корнеў, усяго 0,02 сек яму ўступіў француз Максім Грусэ.

"Пакуль няма слоў, сам не веру ў гэта. Рабіў тое ж самае, што і ў папярэдніх заплывах. Галоўным было не перагарэць і ўсё выканаць дакладна. У мяне атрымалася, я вельмі задаволены", - сказаў Пякарскі.

Папярэднюю стадыю Рыгор пераадолеў з шостым графікам сярод 78 спартсменаў, па выніках паўфінальных заплываў быў сёмым, а ў фінале пабіў свой жа рэкорд Беларусі на гэтай дыстанцыі. Гэты медаль стаў для нашага плыўца першым у кар'еры на кантынентальных форумах. Далей у Парыжы Пякарскі выступіць на стаметроўцы батэрфляем.

версія для друку

зрабіць стартавай

дабавіць у выбранае