3 мая, Мінск /Кар. БЕЛТА/. Цырымонія ўзнагароджвання пераможцаў XIII Нацыянальнага тэлевізійнага конкурсу "Тэлевяршыня" пройдзе ў Палацы Рэспублікі 12 мая, паведамілі карэспандэнту БЕЛТА ў Міністэрстве інфармацыі Беларусі.
Конкурс праводзіцца па 25 намінацыях. Будуць выбраны лепшая грамадска-палітычная праграма і лепшы вядучы такой праграмы, лепшыя тэматычная праграма і вядучы. Журы вызначыць таксама лепшую штотыднёвую інфармацыйна-аналітычную праграму і адпаведна лепшага вядучага, лепшыя дакументальны фільм (цыкл), штодзённую інфармацыйную праграму, праграму для дзяцей і юнацтва, культурна-асветную, забаўляльную праграму.
Пераможцаў назавуць і ў персанальных намінацыях "Лепшы рэпарцёр", "Лепшы вядучы штодзённай інфармацыйнай праграмы", "Лепшы вядучы забаўляльнай праграмы". У шэрагу намінацый перамога можа быць як персанальная, так і камандная: "Лепшы тэлевізійны прадзюсар (прадзюсарская група)", "Лепшы рэжысёр (рэжысёрская група)", "Лепшы аператар (аператарская група)", "Лепшы сцэнарыст (сцэнарная група)".
Будуць названы лепшыя сацыяльная рэклама і тэлевізійны дызайн. Рэгіянальнае тэлебачанне канкурыруе па чатырох пазіцыях: лепшыя вядучы рэгіянальнага тэлебачання, праект, інфармацыйная праграма і тэматычная праграма.
Галоўная ўзнагарода конкурсу - Гран-пры "Тэлевізійны праект года".
Журы, у склад якога ўваходзяць вядомыя рэжысёры, сцэнарысты, акцёры, журналісты, вызначыць па тры фіналісты ў кожнай намінацыі. Усяго на конкурс было пададзена 286 работ ад 33 радыёвяшчальных арганізацый. У конкурсе ўдзельнічаюць айчынныя тэлепраграмы любой працягласці вытворчасці рэспубліканскіх і рэгіянальных тэлевяшчальных арганізацый, іншых вытворцаў розных форм уласнасці, якія выйшлі ў эфір у 2016 годзе.
Падрыхтоўкай цырымоніі ўзнагароджвання пераможцаў конкурсу "Тэлевяршыня" займаецца ЗАТ "Другі нацыянальны канал".