Падзеі, факты, анонсы

12 мая, Мінск /Кар. БЕЛТА/. На тэрыторыі бізнес-інкубатара Парка высокіх тэхналогій у Мінску прайшоў нацыянальны фінал буйнейшага міжнароднага тэхналагічнага конкурсу Imagine Cup 2017 пад эгідай Microsoft, перадае карэспандэнт БЕЛТА.

У рэгіянальным туры прынялі ўдзел 10 каманд. Гэта выпускнікі сярэдніх школ, якім споўнілася 16 гадоў, студэнты беларускіх ВНУ, магістранты і аспіранты.

Кожны год свае праекты на конкурсе прадстаўляюць тысячы маладых талентаў. Трыццаць лепшых каманд з усяго свету адпраўляюцца ў Сіэтл (ЗША) для таго, каб пазмагацца за галоўны прыз - $100 тыс. на далейшае развіццё праекта. У бягучым годзе кампанія Microsoft адмяніла катэгорыі, таму ў юных праграмістаў з'явіўся шанц рэалізаваць любую ідэю. Абавязковыя ўмовы, якія павінен выканаць распрацоўшчык: інавацыйны не падобны на іншыя праект і выкарыстанне пры яго стварэнні воблачных тэхналогій Microsoft Azure і Visual Studio любой версіі. Большасць распрацовак, якія навучэнцы прадэманстравалі ў рамках мінулагодняга конкурсу, знайшлі прымяненне ў сферы адукацыі, аховы здароўя і іншых сацыяльных напрамках.

"Мы ўдзячны карпарацыі Microsoft за падтрымку беларускіх стартапаў і ў цэлым за падтрымку сферы адукацыі. У нас маштабныя сумесныя планы супрацоўніцтва, і адукацыя - адна з ключавых сфер гэтага супрацоўніцтва. Гэта аснова, тая глеба, з якой у IT вырастае ўсё: і стартапы, і кампаніі, і поспехі", - падкрэсліў дырэктар адміністрацыі Парка высокіх тэхналогій Усевалад Янчэўскі.

Кіраўнік прадстаўніцтва Microsoft у Беларусі Антон Мякішаў адзначыў, што беларускі Парк высокіх тэхналогій цяпер перажывае новую хвалю свайго развіцця, як і IT-галіна, падтрымку якой аказваюць на вышэйшым узроўні. "Microsoft не можа заставацца ў баку ад гэтых працэсаў", - сказаў ён.

Кампанія працуе ў Беларусі і з органамі дзяржкіравання, і з сістэмай адукацыі. "Мы падтрымліваем маладых, якія толькі робяць першыя крокі ва ўласным бізнесе. І прыкладам з'яўляецца цяперашні конкурс. Гэта проба сябе ў вялікім жыцці для соцень маладых каманд, і нават калі яны не перамогуць, то атрымаюць вельмі каштоўны вопыт і шмат карысных рэкамендацый і саветаў", - дадаў Антон Мякішаў.

У распараджэнні кожнай каманды было 3 мінуты на прэзентацыю праекта і 2 мінуты на пытанні журы і залы. Пасля выступленняў журы прыняло рашэнне і аб'явіла трох пераможцаў. Каманда Scrawless, якая заняла першае месца, адправіцца на паўфінал Imagine Cup 2017 у Кіеў, дзе прыме ўдзел у спаборніцтве паміж лепшымі камандамі СНД. Свой праект на нацыянальным адборы прадстаўлялі Дзмітрый Кузьміч і Яўгенія Краўчанка (студэнты БДУІР і БНТУ).

Каманда, якая атрымае перамогу ў паўфінале, паедзе ў Сіэтл на міжнародны фінал Imagine Cup.