Падзеі, факты, анонсы

НЦСМ пакажа 33 творы жывапісу, скульптуры і станковай графікі на выставе 15 кастрычніка

Фота з архiва

14 кастрычніка, Мінск /Кар. БЕЛТА/. Экспазіцыя "Трыццаць тры творы. Выстава набыткаў музейнага збору НЦСМ" адкрыецца 15 кастрычніка ў Нацыянальным цэнтры сучасных мастацтваў. Аб гэтым БЕЛТА паведамілі арганізатары.

"З кастрычніка 2015 года НЦСМ набыў шэраг твораў, сярод якіх жывапіс, станковая графіка, скульптура і дэкаратыўна-прыкладное мастацтва. І гэта не толькі класіка. Госці ўбачаць абсалютна розны абстрактны экспрэсіянізм, эксперыментальную скульптуру", - расказалі арганізатары.

Аддаючы даніну класічнай лініі або яе творчаму развіццю, у 2016 годзе цэнтрам набыты бюст заснавальніка Музея сучаснага выяўленчага мастацтва народнага мастака Беларусі Васіля Шаранговіча. Яго аўтар - скульптар Генадзь Мурамцаў. Таксама набыты работы Канстанціна Селіханава. Сярод жывапісцаў вядомы імёны Кацярыны Сумаравай, заслужанага дзеяча мастацтваў Беларусі Валерыя Шкарубы. Калекцыя таксама папоўнілася графічнымі лістамі Паўла Татарнікава, Ганны Ціханавай-Ёрданавай.

У экспазіцыі выставы прадстаўлены творы асобных лаўрэатаў Нацыянальнай прэміі ў галіне выяўленчага мастацтва. Сярод аўтараў - народны мастак Беларусі Уладзімір Тоўсцік, мастак Сяргей Белавокі, дызайнер Эліна Шындлер. Дзяржавай для НЦСМ былі закуплены жывапісныя творы Глеба Отчыка і графічныя - Андрэя Басалыгі. Пасля выставы "Віцебск-100", якая адбылася ў 2018 годзе, цэнтр набыў работы Леаніда Мядзведскага, Віктара Шылко, Міхаіла Ляўковіча. Карціны Яўгена Каробушкіна, Аляксандра Фалея сталі новымі паступленнямі ў фонды.

"Гэта таксама заахвочванне мастакоў, якія спалучаюць актуальны змест і высокі прафесійны ўзровень выканання. Мы чакаем з'яўлення новых, арыгінальных імёнаў, якія будуць упісаны ў гісторыю беларускага мастацтва і ўпрыгожаць нашу калекцыю", - адзначылі ў НЦСМ.

Наведаць экспазіцыю можна па 17 студзеня 2021 года.

версія для друку

зрабіць стартавай

дабавіць у выбранае