17 верасня, Мінск /Кар. БЕЛТА/. Нацыянальная экспазіцыя Беларусі будзе прадстаўлена на сусветнай выстаўцы "ЭКСПА-2015" у італьянскім горадзе Мілан. Такое рашэнне змяшчаецца ў пастанове Савета Міністраў нумар 847 ад 14 верасня 2012 года, паведамілі карэспандэнту БЕЛТА ў прэс-службе беларускага ўрада.
Нацыянальным выставачным аператарам на сусветнай выстаўцы вызначана прыватнае выставачнае ўнітарнае прадпрыемства "Белінтэрэкспа" Беларускай гандлёва-прамысловай палаты, якое згодна з зацверджаным планам мерапрыемстваў па падрыхтоўцы нацыянальнай экспазіцыі будзе ажыццяўляць каардынацыю ўзаемадзеяння з арганізатарамі "ЭКСПА-2015".
Сусветная выстаўка "ЭКСПА" - міжнародная выстаўка, якая з'яўляецца сімвалам індустрыялізацыі і адкрытай пляцоўкай для дэманстрацыі тэхнічных і тэхналагічных дасягненняў. Першая сусветная выстаўка была праведзена ў Гайд-парку ў Лондане па ініцыятыве прынца Альберта. Яе галоўнай выдатнай мясцінай тады быў Хрустальны палац, узведзены Джозэфам Пакстанам з жалеза і шкла. "ЭКСПА-2012" адбылася ў Паўднёвай Карэі, у 2015 годзе сусветную выстаўку прыме ў сябе Мілан (Італія), а ў 2017 годзе - Астана (Казахстан). За права правядзення выстаўкі 2020 года будуць змагацца такія гарады, як Аютхая (Тайланд), Дубай (ААЭ), Ізмір (Турцыя), Сан-Паўлу (Бразілія) і Екацярынбург (Расія).
Пн | Аўт | Сер | Чцв | Пт | Сб | Нядз |
---|