Падзеі, факты, анонсы

Народныя гулянні, выстаўкі ўзбраення, канцэрты: як беларусам правесці Дзень Перамогі

Фота з архiва

5 мая, Мінск /Кар. БЕЛТА/. Намеснік начальніка галоўнага ўпраўлення - начальнік упраўлення дзяржаўных спецыяльных культурных мерапрыемстваў Мінкультуры Іна Адамовіч расказала сёння журналістам, як беларусы змогуць адзначыць Дзень Перамогі, перадае карэспандэнт БЕЛТА.

"Да святкавання 77-й гадавіны Перамогі савецкага народа ў Вялікай Айчыннай вайне ва ўсіх абласных цэнтрах, абласцях, у Мінску запланаваны святочныя мерапрыемствы, якія пройдуць гэтак жа маштабна, як і ў папярэднія гады. Паўсюдна будуць арганізаваны ўскладанне кветак да мемарыялаў, наведванне музейных, гісторыка-культурных комплексаў, месцаў пахавання ахвяр вайны. 9 мая па ўсёй краіне пройдуць масавыя народныя гулянні з ваенна-патрыятычнымі пляцоўкамі, канцэртнымі праграмамі. Напярэдадні і ў дзень свята адбудуцца індывідуальныя ўшаноўванні ветэранаў, якія па стане здароўя не могуць выходзіць з дома і наведваць нашы мерапрыемствы", - расказала Іна Адамовіч.

У канцэртных праграмах будуць удзельнічаць вядучыя артысты і калектывы. "Сярод іх - салісты Вялікага тэатра Беларусі, вядучыя артысты эстрады. Шырока прадстаўлена моладзь ва ўсіх мерапрыемствах, у тым ліку прадстаўнікі нашай рэспублікі на конкурсах "Славянскага базару", лаўрэаты спецыяльнага фонду Прэзідэнта Беларусі па падтрымцы таленавітай моладзі, рэгіянальныя творчыя калектывы літаральна з усіх абласцей. Сюрпрызам стане выкананне прэм'ер песень, якія спецыяльна створаны да кожнага мерапрыемства", - дадала намеснік начальніка.

Ваеннаслужачыя Узброеных Сіл падрыхтавалі праграму да Дня Перамогі ва ўсіх гарадах і населеных пунктах. Так, 6 мая на Кастрычніцкай плошчы Мінска будзе арганізавана выстаўка ваеннай тэхнікі, на якой будуць прадстаўлены як сучасныя ўзоры, так і рэтратэхніка.

"9 мая ў парку Перамогі сталіцы запланавана маштабная ваенна-тэматычная пляцоўка, дзе мінчане і госці сталіцы змогуць убачыць не толькі дасягненні ўзбраення, ваенную тэхніку, але і ацаніць паказальнае выступленне службовых сабак кіналагічнага цэнтра Узброеных Сіл, змогуць паўдзельнічаць у розных конкурсах, розыгрышы арыгінальных прызоў і падарункаў, папрактыкавацца ў інтэрактыўным стралковым ціры, зрабіць унікальныя здымкі ў фотазоне ў экіпіроўцы, пачаставацца салдацкай кашай. На тэматычнай пляцоўцы прадугледжаны святочны канцэрт з удзелам мастацкіх калектываў УС", - звярнуў увагу намеснік начальніка ўпраўлення - начальнік 1-га аддзела ўпраўлення інфармацыі галоўнага ўпраўлення ідэалагічнай работы Мінабароны Дзяніс Фёдараў.

У парку Перамогі таксама будзе функцыянаваць перасовачная экспазіцыя Дзяржаўнага музея гісторыі Узброеных Сіл. Праект раскрывае не толькі этапы станаўлення, развіцця беларускай арміі, але і адлюстроўвае значны ўклад беларускага народа ў дасягненне Вялікай Перамогі.

"Удзел у мерапрыемствах, прымеркаваных да свяшчэннага для кожнага з нас свята, дае нам магчымасць яшчэ глыбей зразумець значнасць Вялікай Перамогі, атрыманай нашымі дзядамі і прадзедамі, усвядоміць каштоўнасць міру, які надзейна захоўваецца ў Беларусі сучаснымі пакаленнямі абаронцаў Айчыны", - сказаў на заканчэнне Дзяніс Фёдараў.

версія для друку

зрабіць стартавай

дабавіць у выбранае