Падзеі, факты, анонсы

НАН Беларусі назвала топ-10 вынікаў вучоных за 2020 год

Фота з архiва

4 студзеня, Мінск /Кар. БЕЛТА/. Бюро Прэзідыума Нацыянальнай акадэміі навук вызначыла топ-10 вынікаў дзейнасці вучоных акадэміі за 2020 год у галіне фундаментальных і прыкладных даследаванняў, паведамілі БЕЛТА ў прэс-службе НАН.

Аўтарскі калектыў Інстытута біяарганічнай хіміі і Аб'яднанага інстытута праблем інфарматыкі ўвайшоў у топ-10 за ідэнтыфікацыю метадамі камп'ютарнага скрынінгу і малекулярнага мадэлявання патэнцыяльных інгібітараў каранавіруса SARS-CoV-2.

Загадчык лабараторыі трансгранічнага забруджвання Інстытута прыродакарыстання НАН Сяргей Какарэка адзначаны за колькаснае мадэляванне распаўсюджвання аэразольна-газавых прымесей у атмасферы Беларускай антарктычнай станцыі і ўстанаўленне тэндэнцый іх змянення за 30-гадовы перыяд.

Калектыў аўтараў Інстытута біяхіміі біялагічна актыўных злучэнняў НАН і Гродзенскага дзяржаўнага ўніверсітэта імя Я.Купалы аказаўся ў спісе лепшых за распрацоўку біямедыцынскай тэхналогіі аднаўлення клетак печані на аснове комплексу фізіялагічна актыўных злучэнняў, якія валодаюць высокай антыаксідантнай і процізапаленчай актыўнасцю.

Таксама сярод пераможцаў - калектыў вучоных Інстытута фізікі імя Б.І.Сцяпанава (за ўстанаўленне механізма  дзеяння актыўных форм кіслароду ў рэалізацыі эфектаў фотабіястымуляцыі нізкаінтэнсіўным лазерным выпрамяненнем рэпрадуктыўнай функцыі жывёл) ​​і аграрыі НПЦ па земляробстве (за стварэнне гетэрозісных гібрыдаў азімага жыта на аснове сістэмы цытаплазматычнай стэрыльнасці як асновы павышэння генетычнага патэнцыялу).

Аўтарскі калектыў Аб'яднанага інстытута машынабудавання і Інстытута механікі металапалімерных сістэм імя  У.А.Белага будзе ўзнагароджаны за стварэнне інфармацыйных мадэлей - лічбавых двайнікоў гідра- і электрамеханічных прыводаў для праектавання і маніторынгу транспартных машын новага пакалення.

Сярод тых, хто трапіў у дзясятку лепшых, - калектыў вучоных Інстытута цепла- і масаабмену імя А.В.Лыкава за распрацоўку і прымяненне механахімічнага нанамадыфікавання шматфункцыянальных кампазіцыйных пакрыццяў кампанентаў мікратэхнікі.

Вучоныя Інстытута біяарганічнай хіміі ўвайшлі ў лік пераможцаў за выяўленне феномена паскарэння фасфаролізу нуклеазідаў шляхам імабілізацыі ферментных субстратаў на аніёнаабменніках як асновы для высокаэфектыўнага сінтэзу проціпухлінных прэпаратаў.

Аўтарскі калектыў Інстытута мікрабіялогіі ўзнагародзяць за стварэнне рэкамбінантных штамаў бактэрый - прадуцэнтаў чалавечага бялку анексіну ў адзінстве з адэназін-дэградзіруючымі ферментамі як асновы стварэння біяпрэпаратаў новага пакалення.

Вучоныя НПЦ па біярэсурсах вызначылі ступень матэматычнай значнасці велічынь рызык пранікнення і распаўсюджвання чужародных відаў водных беспазваночных на тэрыторыі Беларусі.

Узнагароджанне пераможцаў будзе прымеркавана да святкавання Дня беларускай навукі ў канцы студзеня 2021 года.

версія для друку

зрабіць стартавай

дабавіць у выбранае