Падзеі, факты, анонсы
Міжнародны прэс-цэнтр адкрылі на "Славянскім базары ў Віцебску"
16 ліпеня, Віцебск /Кар. БЕЛТА/. Міжнародны прэс-цэнтр адкрылі на "Славянскім базары ў Віцебску", перадае карэспандэнт БЕЛТА.
Сёння ў канцэртнай зале "Віцебск" адкрылі міжнародны прэс-цэнтр, які з'яўляецца сэрцам медыйнага жыцця фестывалю мастацтваў. Тут традыцыйна праходзяць прэс-канферэнцыі, у тым ліку з членамі журы песенных конкурсаў, ідуць анлайн-трансляцыі зорных гадзін з вядомымі артыстамі, рыхтуюць сюжэты і пішуць артыкулы журналісты дзясяткаў СМІ.
У гэтым годзе ў фестывалі ўдзельнічаюць прадстаўнікі 52 краін, што з'яўляецца рэкордным за ўвесь час існавання "Славянскага базару ў Віцебску".
На адкрыцці міжнароднага прэс-цэнтра ўзнагародзілі прадстаўнікоў СМІ, якія з году ў год прыязджаюць у Віцебск, каб расказаць аўдыторыі розных краін аб форуме. Падзяку міністра інфармацыі за асвятленне фестывальных падзей уручылі вядучаму фотакарэспандэнту БЕЛТА Аляксандру Хітрову. Ён працуе на "Славянскім базары" з першага дня яго існавання, сабраў вялікі архіў, у якім ёсць унікальныя здымкі зорак сусветнай велічыні. У гэтым годзе ён адзначыў 50-годдзе працоўнай дзейнасці. Усе фотаальбомы аб фестывалі створаны з яго ўдзелам. Таксама ў гэтым годзе на мосце 1000-годдзя Віцебска працуе прымеркаваная да юбілею "Славянскага базару" выстава БЕЛТА "35 імгненняў фестывалю", большасць фатаграфій для якой у розныя гады зрабіў Аляксандр Хітроў.
Прадстаўнікі абласной і гарадской улады расказалі, як змяніўся Віцебск перад фестывалем. У горадзе з'явіліся новыя кампазіцыі з кветак. Святочная ілюмінацыя прапрацавана так, каб максімальна падкрэсліць прыгажосць архітэктуры. Аб'екты грамадскага харчавання прапануюць фестывальны сэт, а ў гасцініцах створаны максімальна камфортныя ўмовы для гасцей. На ўсіх цэнтральных лакацыях Віцебска на працягу форуму будуць праходзіць масавыя мерапрыемствы.
Намеснік дзяржсакратара Саюзнай дзяржавы Аляксей Казакоў расказаў, што ў гэтым годзе праграма Дзён СД на фестывалі будзе насычанай. Гэта не толькі гала-канцэрт у Летнім амфітэатры, але і кінапаказы, выступленні музыкантаў. "У аснову гала-канцэрта пакладзены такія важныя падзеі гэтага года, як 85 гадоў з пачатку Вялікай Айчыннай вайны, 65 гадоў палёту Гагарына, 90-годдзе "Саюзмультфільма" і 100-годдзе беларускага кіно. Саюзная дзяржава ўдзяляе вялікую ўвагу дзецям, для іх будзе праходзіць спецыяльнае мерапрыемства "Цыркалета". Віцебск стане сталіцай джаза, адбудуцца вялікія джазавыя канцэрты розных калектываў на Пушкінскай плошчы і ў сядзібе "Здраўнёва", - сказаў Аляксей Казакоў.
Дні моладзі традыцыйна збяруць самых актыўных і энергічных. Маладзёжная зарадка ў Віцебскім цэнтральным спартыўным комплексе, конкурсы, патрыятычныя мерапрыемствы, сустрэчы з аднадумцамі - усяго каля 400 прадстаўнікоў маладога пакалення прымуць удзел у падзеях на розных пляцоўках фестывальнай сталіцы. Першы сакратар ЦК БРСМ Уладзімір Паўлоўскі адзначыў, што новаўвядзеннем гэтага года стане спартыўны складнік свята.
Генеральны дырэктар цэнтра культуры "Віцебск", дырэктар міжнароднага фестывалю мастацтваў "Славянскі базар у Віцебску" Глеб Лапіцкі адзначыў, што поўнасцю змянілі падрыхтоўку да форуму, мерапрыемствы сістэматызавалі, а яшчэ правялі маштабны тур па ўсіх абласных гарадах Беларусі. "Мы вельмі доўга ішлі да таго, каб акрамя асноўных развіваць спадарожныя мерапрыемствы асноўнай праграмы. Мы доўга разважалі над тым, як зрабіць дзіцячы конкурс такім жа цікавым, як і дарослы. У гэтым годзе нашу анлайн-трансляцыю глядзелі 700 тыс. чалавек, у мінулым годзе - усяго 150 тыс.", - расказаў ён.
версія для друку
зрабіць стартавай
дабавіць у выбранае