28 жніўня, Гродна /Алена Стасюкевіч - БЕЛТА/. Міжнародны фестываль вулічных мастацтваў
Grand Teatro пройдзе 31 жніўня ў Гродне, паведамілі карэспандэнту БЕЛТА арганізатары мерапрыемства - удзельнікі праекта "Жывая гісторыя".Фестываль прысвечаны знакамітаму выхадцу з Гродна тэатральнаму мастаку і майстру эпатажу Льву Баксту.
Пад адкрытым небам на цэнтральнай пешаходнай вуліцы Савецкай абласнога цэнтра ў гэты дзень можна будзе ўбачыць ажыўшыя статуі, эквілібрыстаў, магаў і акцёраў вулічных тэатраў. На пляцоўцы каля Маладзёжнага цэнтра Гродна адбудзецца маляўнічае шоу. Жыхары і госці горада ўбачаць тэатралізаваны экскурс у гісторыю жыцця і творчасці Льва Бакста і пазнаёмяцца з рэпрадукцыямі работ мастака. Каля помніка В.Д.Сакалоўскаму размесціцца творчая пляцоўка для дзяцей.
На фестывалі выступіць спецыяльны госць - пластычны тэатр "ІнЖэст" з праграмай "Залаты век" (зялёная пляцоўка каля Гродзенскага гарвыканкама). Усяго ж у ім прымуць удзел амаль 30 артыстаў арыгінальных жанраў і вулічных тэатраў з Беларусі, Расіі і Літвы.
Арганізатарамі мерапрыемства выступаюць рабочая група праекта "Жывая гісторыя", Гродзенскі аблвыканкам, гарвыканкам, Гродзенскі ўніверсітэт імя Янкі Купалы.
"Жывая гісторыя" - маладзёжная ініцыятыва студэнтаў Гродзенскага дзяржуніверсітэта імя Янкі Купалы, накіраваная на папулярызацыю гісторыка-культурнай спадчыны і развіццё турыстычнага патэнцыялу вобласці. Яе ўдзельнікам ужо ўдалося рэалізаваць нямала цікавых ідэй.
Пн | Аўт | Сер | Чцв | Пт | Сб | Нядз |
---|