Падзеі, факты, анонсы

27 сакавіка, Брэст /Кар. БЕЛТА/. ІІІ Міжнародны фестываль-конкурс дзіцячай і маладзёжнай творчасці "Дзеці планеты" пройдзе ў Брэсце з 27 красавіка па 1 мая, паведамілі карэспандэнту БЕЛТА ў аргкамітэце форуму.

Пляцоўкамі фестывалю стануць Брэсцкі акадэмічны тэатр драмы, дзяржаўны ўніверсітэт імя А.С. Пушкіна, абласны краязнаўчы музей. Акрамя канцэртаў у праграме мерапрыемства заяўлены творчыя вечары, майстар-класы, вечары культуры краін - удзельніц форуму. Цырымоніі ўрачыстага адкрыцця і закрыцця фестывалю будуць суправаджацца салютам з шароў.

У гэтым годзе творчыя спаборніцтвы пройдуць у шасці намінацыях і ў чатырох узроставых катэгорыях - ад 5 да 21 года. Да ўжо традыцыйных харэаграфіі, вакалу, інструментальнага выканання, тэатральнага майстэрства, выяўленчай і дэкаратыўна-прыкладной творчасці дабавіцца арыгінальны жанр. Да конкурсу дапускаюцца ўсе віды цыркавога мастацтва, акрамя паветранай акрабатыкі, а таксама канцэртных нумароў з выкарыстаннем агню і жывёл. Таксама ў рамках арт-праекта плануецца фотавыстаўка пясочных работ і эксклюзіўны майстар-клас па пескаграфіі.

Ацэньваць дзіцячую і маладзёжную творчасць будзе кампетэнтнае журы з дзеячаў культуры, прадстаўнікоў культурных асацыяцый і грамадскіх дзеячаў. Лаўрэаты і дыпламанты фестывалю будуць адзначаны дыпломамі міжнароднага ўзору. Таксама незалежна ад намінацыі журы вызначыць лепшага ўдзельніка або калектыў, якому будзе прысуджаны Гран-пры форуму.

Заяўкі на ўдзел у фестывалі-конкурсе "Дзеці планеты" прымаюцца да 31 сакавіка. "У гэтым годзе мы чакаем большую колькасць удзельнікаў і краін, якія яны прадстаўляюць. За час правядзення двух першых фестываляў набыты пэўны вопыт, мы прыбавілі актыўнасці ў рабоце. Вядзецца актыўная перапіска з патэнцыяльнымі ўдзельнікамі, ахоплены практычна ўсе рэгіёны нашых бліжэйшых суседзяў - Расіі, Украіны, Польшчы. Адпраўлены запрашэнні ў краіны СНД, а таксама Італію, Іспанію, Аўстрыю, Германію, Нідэрланды, Бразілію і іншыя краіны", - адзначылі ў аргкамітэце.

Арт-праект "Дзеці планеты" стартаваў у Брэсце летам 2016 года. Тады ў ім прынялі ўдзел амаль 600 юных артыстаў з Беларусі, Польшчы, Украіны, Расіі, Туркменістана. Другі па ліку фестываль сабраў больш за 900 удзельнікаў з розных краін. Заснавальнікамі фестывалю-конкурсу выступаюць міжнароднае грамадскае аб'яднанне "Дабрачыннасць дзецям", турыстычнае агенцтва АTIR пры падтрымцы Брэсцкага гарвыканкама. Мэтай праекта з'яўляюцца ўстанаўленне творчых кантактаў паміж прадстаўнікамі моладзі розных краін, умацаванне міжнародных сувязей, захаванне нацыянальных культур, пашырэнне гуманітарнага супрацоўніцтва.