Падзеі, факты, анонсы
Мінск стаў першым горадам у турнэ выстаўкі Нацыянальнага музея гісторыі Латвіі
28 сакавіка, Мінск /Яўген Сакалоўскі - БЕЛТА/. Мінск стаў першым горадам у еўрапейскім турнэ выстаўкі "Янтар - каштоўны камень Балтыйскага мора" Нацыянальнага музея гісторыі Латвіі. Экспазіцыя адкрылася ў Нацыянальным гістарычным музеі Беларусі, паведамляе карэспандэнт БЕЛТА.
"Для нас гэта выстаўка асаблівая, паколькі яна стала адным з самых паспяховых праектаў у праграме горада Рыгі як культурнай сталіцы Еўропы "Рыга-2014". Яна з'яўляецца тэматычным апавяданнем пра Балтыйскае мора, пра скрыжаванне шляхоў янтару, пра яго ролю ў латышскім мастацтве", - расказаў на адкрыцці выстаўкі пасол Латвіі ў Беларусі Міхаіл Попкаўс.
У экспазіцыі прадстаўлены ўпрыгажэнні і касцюмы: унікальная рэканструкцыя касцюма з могільніка Звейніеку з больш як 100 янтарнымі прадметамі, традыцыйны латышскі народны касцюм з янтарнымі ўпрыгажэннямі, сучасны касцюм з янтарнымі ўпрыгажэннямі народнага прыкладнога мастацтва, характэрнымі для другой палавіны XX стагоддзя. Фібулы, гузікі, пацеркі, янтар у камплекце з іншымі матэрыяламі, падвескі, кулоны - усе гэтыя прадметы з'яўляюцца адлюстраваннем развіцця янтару з самых старажытных часоў да нашага часу.
Пры дапамозе мультымедыйных рашэнняў на выстаўцы можна прайсціся па янтарных шляхах і азнаёміцца з унікальнымі экспанатамі: фігуркай галавы лася (3400-2300 гадоў да н.э.) і зааморфнай фігуральнай падвескай (2900-1800 гадоў да н.э.).
Паводле слоў дырэктара Нацыянальнага гістарычнага музея Беларусі Алега Рыжкова, арганізатары экспазіцыі ўклалі ў яе свае сілы і душу. "Усе экспанаты з'яўляюцца музейнымі, што бывае даволі рэдка", - падкрэсліў ён.
Выстаўка "Янтар - каштоўны камень Балтыйскага мора" будзе працаваць у Нацыянальным гістарычным музеі да 24 красавіка.
версія для друку
зрабіць стартавай
дабавіць у выбранае