Падзеі, факты, анонсы

Мінюст назваў топ-5 імёнаў дзяўчынак у 2020 годзе

Фота з архiва

5 сакавіка, Мінск /Кар. БЕЛТА/. Міністэрства юстыцыі назвала топ-5 імёнаў дзяўчынак у 2020 годзе, паведамляе БЕЛТА са спасылкай на прэс-службу Мінюста.

Паводле звестак загсаў, сярод самых папулярных уласных імёнаў, якія бацькі давалі дзяўчынкам у мінулым годзе, былі Сафія, Марыя, Ганна, Ксенія, Дар'я.

У рэгіёнах расклад папулярных імёнаў, зарэгістраваных у 2020 годзе, мяняўся. Так, у сталіцы трэцяе па папулярнасці імя дзяўчынкі - Аліса, пятае - Ева. У Гомельскай вобласці часцей, чым у іншых рэгіёнах, рэгістравалі імя Паліна, у Віцебску папулярнае імя Настасся, у Магілёве - Мілана, у Гродне - Вікторыя.

У імёнах дзяцей апошнія гады назіраецца тэндэнцыя прысваення рэдкіх і незвычайных, а таксама старадаўніх уласных імёнаў. Паводле статыстыкі органаў ЗАГС, дзяўчынак часцей, чым хлопчыкаў, называюць рэдкімі імёнамі. Толькі ў Мінску ў запісах актаў аб нараджэнні імёны 272 дзяўчынак сустракаюцца толькі аднойчы. Найбольшая колькасць дзяцей з унікальнымі імёнамі ў Мінску і абласных цэнтрах.

Сярод рэдкіх і незвычайных, а таксама старадаўніх уласных імёнаў, якія выбралі бацькі для дачок, былі Арыэла, Арфелія, Алексія, Асія, Вірынея, Вірсавія, Дзіва, Жаміла, Зарана, Ілірыя, Іванка, Капіталіна, Касіяпея, Кірыя, Лаліта, Луна, Марфа, Мілаліка, Мальвіна, Мара, Рагнеда, Рукая, Самія, Саная, Петра, Славяна, Сонай, Сімрана, Сандрынья, Урміла, Шанель, Цвятана, Эвалет, Эля, Юсра, Юна, Ядвіга, Ясна.

У Мінюсце нагадалі, што бацькі маюць права выбраць для дзіцяці любое ўласнае імя, якое не супярэчыць нормам грамадскай маралі, нацыянальным традыцыям. Дзіцяці можа быць дадзена не больш за два ўласныя імёны. Асноўным лічыцца імя, пазначанае ў запісе акта аб нараджэнні першым.

У мінулым годзе бацькі таксама давалі дачкам двайныя імёны: Ганна-Люцыя, Арыфе-Сафія, Варвара Маргарыта, Дамініка Аліса, Лейла Ларыса, Лідзія-Луіза, Меланія Аляксандра, Мія Руслана, Стафанія Марыя.

Некалі папулярныя імёны, напрыклад у 1980-я, Вольга, Наталля, Таццяна, у 1960-я - Алена, Ірына, Святлана, цяпер пры рэгістрацыі сустракаюцца рэдка.

версія для друку

зрабіць стартавай

дабавіць у выбранае